Өнгөрсөн ээлжит бус чуулганаас УИХ-ын гишүүд өөрийн нэг нэг туслахыг, Тамгын газрын 10 хувийг  цомхотгох шийдвэр гарсан билээ.

Энэ нь олонхи гишүүд эдийн засгийн хямралыг даван гарахын тулд УИХ өөрөөсөө эхлэн “хэмнэлт” хийх  хэрэгтэй хэмээн үзсэнтэй холбоотой юм.

Дээрх  шийдвэрийг гүйцэтгэхээр УИХ-ын Ерөнхий нарийн бичгийн дарга Ц.Шаравдоржоор ахлуулсан ажлын хэсэг гарч ажиллаж байгаа юм.  Уг ажлын хэсэг ирэх Даваа гаригт УИХ-ын даргад өөрийн ажлын тайлангаа танилцуулах ёстой юм. Ажлын хэсэг “хэнийг цомхотгох нь зөв” гэдэг судалгаа шинжилгээ хийж дуусаад өнөөдөр эцсийн байдлаар гаргах юм байна.
УИХ-ын гишүүдийн 17 гишүүн нэг туслахтай учир үлдсэн 58 гишүүний туслахаас нэг нэгийг хасахаар болсон аж. Одоогоор 32 туслах ажлаасаа халагдаад байгаа юм байна. Харин 17 гишүүн гадаад томилолттой байгаа учир хараахан хариу ирүүлээгүй байгаа ажээ. Дээрх 58 туслахыг хассанаар улсын төсөвт нийт 18.6 сая төгрөгийн хэмнэлт гарна гэсэн тооцоо байгаа юм.

УИХ-ын тамгын газрын хувьд одоогийн байдлаар 215 хүний бүрэлдэхүүнтэй ажилладаг бөгөөд үүнээсээ 41 хүнийг цомхотгох ёстой.Энэ 41 хүний 10 хүнийг нь өмнө нь 15 хүний орон тоотой “Бодлогын шинжилгээний төв” байж байгаад одоо 41 хүнтэй болж өргөжсөн “судалгааны төвөөс” цомхотгох ёстой ажээ.

Сангийн яам дөрөвдүгээр сарын нэгний өдрөөс эхлэн УИХ-ын Тамгын газар, гишүүдийн туслах нийлээд 107 хүний цалинг хасахаар болсноо Тамгын газарт мэдэгдсэн байна.