Олон улсын парламентын холбооны /ОУПХ/120 дугаар Ассамблей Этиоп улсын Аддис-Абеба хотноо болж байна.

УИХ-ын дарга Д.Дэмбэрэл, дэд дарга Г.Батхүү, УИХ-ын гишүүн Р.Буд, Р.Раш нар тус Ассамблейд оролцож буй. Аддис-Абеба дахь НҮБ-ын хурлын төвд болж буй эл Ассамблей "Улс оронд хямрал тохиолдсон үед парламентаас энх тайван, ардчилал, хөгжил дэвшлийг хангаж ажиллах нь" гэсэн ерөнхий сэдэв дор болж байгаа аж. Ассамблейн нэгдсэн хуралдаан болон байнгын хороодоор "Парламентууд: Ороо бусгаа үед энх тайван, ардчилал болон хөгжлийн төлөө", "Цөмийн зэвсгийг үл дэлгэрүүлэх, зэвсэг хураах болон цөмийн туршилтыг бүх нийтээр хориглох тухай гэрээг хүчин төгөлдөр болгох үйл явцыг урагшлуулах нь: Парламентуудын үүрэг", "Цаг уурын өөрчлөлт, тогтвортой хөгжлийн загварууд болон сэргээгдэх эрчим хүч", "Өсвөр насны охид: Охид ард орхигдоод байна уу?", "Үндэстэн ястан хоорондын зохицуулалт" сэдвээр өргөн хүрээтэй хэлэлцүүлэг өрнүүллээ.

УИХ-ын дарга Д.Дэмбэрэл Ассамблейн нэгдсэн чуулганд илтгэл тавьж, зарим орны парламентын төлөөлөгчтэй уулзалт хийлээ. Тэрбээр Австралийн Парламентын төлөөлөгчдийн танхимын дарга, ноён Харра Женкинс, Австрийн парламентын дарга, хатагтай Хифрэд Карл, Канадын парламентч, ноён Жон Оливер нартай тус тус уулзаж, хоёр орны парламентын хамтын ажиллагаа, ололт, харилцан ашиггай түншлэлийн асуудлаар санал бодлоо солилцов. Уулзалтуудын үеэр талууд парламент хоорондын Тамгын газруудын түншлэлийг онцолж, харилцан нягт хамтын ажиллагааг шинэ шатанд хөгжүүлэхийг тэмдэглэв.

УИХ-ын дарга Олон улсын парламентын холбооны ерөнхийлөгч, Намиби улсын парламентын танхимын ерөнхийлөгч, ноён Тео Бен Гурираб, Ерөнхий нарийн бичгийн дарга, Шведийн иргэн ноён Андерс Б.Жонсон нартай бас уулзав. Энэ удаагийн хурлыг амжилттай зохион байгуулж байгаад Д.Дэмбэрэл тэдэнд баяр хүргээд, Олон улсын парламентын холбооны үйл ажиллагаанд Монголын парламентын зүгээс үргэлж идэвх санаачилгатай оролцохыг эрмэлзэж ирсэн, хоёр тал байнга мэдээлэл солилцож идэвхтэй хамтран ажиллаж байгааг тэмдэглэж хэлэв. Тэрбээр, ОУПХ-ны Ерөнхийлөгчийг тааламжтай цагтаа Монголд зочилж, парламентын үйл ажиллагаатай танилцахыг урилаа гэж УИХ-ын Хэвлэл мэдээлэл, сурталчилгааны хэлтэс мэдээллээ