Нийслэлийн Баянгол дүүрэгт УИХ-ын сонгуулийн 25 дугаар тойрог харьяалагддаг.

Энэ тойрог дөрвөн мандаттай. Үүнээс өнөөдөр Х.Тэмүүжин, Д.Энхбат, Ц.Мөнх-Оргил гурав л парламентад сууж байгаа. Эзгүй байгаа нэг мандатын асуудлыг түргэн шийдэж өгөхийг Баянгол дүүргийн сонгогч иргэд төр, засагт тавьж, СЕХ-ноос нэхсээр жил шахам болох гэж байна. Асуудлыг хурдан шийдэхгүй бол энэ удаагийн Ерөнхийлөгчийн сонгуульд оролцохгүй байсан ч яахав хэмээн зарим сонгогч бойкот (хориг) зарласан байна.

Хоосон байгаа нэг мандатын эзнээр уг нь АН-аас нэр дэвшсэн С.Эрдэнэ тодорсон боловч тэрээр нийгмийн даатгалын өмч идсэн гэх хэргээр ял эдлэн өдгөө “Ганц худаг”-т гурван сарын хугацаа өнгөрөөд байгаа билээ. Баянголынхон УИХ-ын дутуу нэг суудлаар гул барин Ерөнхийлөгчийн сонгуульд оролцохгүй байх эрх бий юу гэсэн асуултад улс төр судлаачдын зүгээс “Сонгогчийн эрх Үндсэн хуулиар хамгаалагдсан байгаа” гэсэн бол “Ерөнхийлөгчийн сонгууль УИХ-ынхаас тусдаа сонгууль” гэсэн хоёр янзын тайлбар өгч байна. Сүүлийн мэдээгээр шүүхийнхэн С.Эрдэнийн хэргийг цайруулж, түүнийг удахгүй суллах сургаар баянгол дүүргийн зарим иргэд Ерөнхийлөгчийн сонгуульд оролцохгүй гэсэн хоригоо татан авч цуцалж байгаа аж.