Энэ онд дотооддоо улаан буудайн 78 хувийг хангана

Энэ онд улсын хэмжээгээр 280 мянган га-д үр тариа, 12.5 мянган га-д төмс, 7.5 мянган га-д хүнсний ногоо, 10 мянган га-д малын тэжээлийн ургамал тариалж, 340 мянган тонн буудай, 150 мянган тонн төмс, 102 мянган тонн хүнсний ногоо, 25 мянган тонн тэжээлийн ургамал тариалан, хураан авахаар төлөвлөөд байгаа ажээ. Хэрэв дээрх төлөвлөгөөг хэрэгжүүлж чадвал энэ онд дотоодын нийт улаан буудайн 78 хувийг, төмсний 100 хувь, хүнсний ногооны 60.7 хувийг тус тус манай улс өөрсдөө дотооддоо хангах боломжтой юм байна.

Хаврын энэ тариалалтыг хийхийн тулд нийт 43.5 мянган тонн үр шаардлагатай юм байна. Одоогоор Тариалан эрхлэлтийг дэмжих санд 7.5 мянган тонн, Онцгой байдлын ерөнхий газрын Улсын нөөцийн салбарт 3.9 мянган тонн, аж ахуйн нэгж, иргэдэд 19.1 мянган тонн нийтдээ 30.5 мянган тонн үрийн нөөц бүрдээд бөгөөд 13.0 мянган тонн нь үр дутагдах тооцоо гарчээ.

Дутагдаж буй үрийн 5.0 мянган тонныг нь импортоор авахаар, үлдсэн 8.0 мянган тонн үрийг Монгол Улсыг хөгжүүлэх санд стратегийн нөөц хэлбэрээр байршуулсан хүнсний буудайг дахин цэвэрлэж үрийн стандартад тэнцүүлэн гаргахаар төлөвлөж байгаа ажээ.