Цаг агаарын аюултай үзэгдлийн улмаас Дундговь, Өмнөговь, Өвөрхангай аймагт 183 малчин, зорчигч иргэн сураггүй алга болжээ. Дээрх аймгуудын Онцгой байдал, нутгийн захиргааны байгууллага, онцгой комисс 157 хүнийг эсэн мэнд олж 18 хүнийг эрэн хайж байна. Харамсалтай нь 8 хүн осгож амь насаа алджээ. Эрэн хайх, аврах ажиллагаанд дээрх аймгуудын Онцгой байдлын хэлтсийн 14 албан хаагч, орон нутгийн 165 иргэн, нийт 179 хүн оролцож байна.

Улсын Онцгой комисс хуралдан цагийн байдал, цаашид авч хэрэгжүүлэх арга хэмжээний талаар ярилцлаа. Одоогоор хичнээн мал хорогдсон мэдээлэл гараагүй байгаа ч нэгдсэн дүн гарвал даатгалын компанид хандахаар төлөвлөж байна. Аюулт үзэгдэл болсон аймгуудад Улсын Онцгой комиссын дарга, Монгол улсын Шадар сайд М.Энхболд, Онцгой байдлын Ерөнхий газрын удирдлагууд ажиллаж холбогдох арга хэмжээг газар дээр нь авахаар боллоо.

Цаг агаарын аюулт үзэгдэл болно гэдгийг Ус, цаг уур, эрдэм шинжилгээний хүрээлэн 7 хоногийн өмнөөс хэвлэл, мэдээллийн хэрэгслээр байнга анхааруулж байсан ч малчид, иргэд хайхрамжгүй хандсанаас амь насаа алдсан эмгэнэлтэй явдал тохиолдлоо. Цаашид цаг агаарын аюулт үзэгдлийн талаархи сэрэмжлүүлэг мэдээг ойр давтамжтай өгч байхыг холбогдох байгууллагад нь даалгалаа.

Хүчтэй шуурганы улмаас учирсан хохирлыг арилгахад 668 сая төгрөг шаардлагатай гэсэн тооцоо гарчээ. Амь насаа алдсан хүмүүсийн ар гэрт буцалтгүй тусламж олгох, орон гэргүй болсон айл өрхөд иж бүрэн гэр, Өвөрхангай аймагт Улсын нөөцөөс тэжээл, өвс хүргүүлэхээр Онцгой комиссын хурлаас шийдэж Засгийн газрын ээлжит бус хуралдаанд оруулах боллоо.

Шуурганд 8 хүн нас барлаа