Эрүүл мэндийн тухай хуульд өөрчлөлт оруулж, дадлагажигч гэсэн нэр томьёог хасахаар боллоо.

Анагаах ухааны дээд боловсрол олгодог сургууль төгсөгчид эмнэлэгт эмчлэх эрхийн зөвшөөрөлгүй 2 жил дадлагажигч хийдэг нь олон нийтийн дунд эмчлэх эрхгүй, хүлээх хариуцлага нь тодорхойгүй хүмүүсийг ажиллуулж байна гэсэн шүүмжлэлд ихээхэн өртдөг билээ. Энэхүү бэрхшээлтэй асуудлуудыг шийдвэрлэх зорилгоор “Эрүүл мэндийн тухай хуульд нэмэлт, өөрчлөлт оруулах тухай” хуулийн төслийг боловсруулахаар болжээ. Эмнэлгийн мэргэжилтэнд мэргэжлийн үйл ажиллагаа эрхлэх зөвшөөрлийг Эрүүл мэндийн газар болон Эрүүл мэндийн яамны дэргэдэх Эмнэлгийн мэргэжилтний ёс зүйн хорооны дүгнэлтийг үндэслэн Эрүүл мэндийн Сайд олгох юм байна. Анагаах ухааны их, дээд сургуулийг төгссөн их эмч дээрх зөвшөөрлийг авснаар эрүүл мэндийн байгууллагад ажиллахад нь 2 жилийн хугацаатай эмчлэх эрхтэй эмч гэсэн статустай ажиллах ажээ. Үүнтэй холбогдуулан эмнэлгийн мэргэжилтний мэргэжлийн үйл ажиллагаа эрхлэх зөвшөөрлийн хугацааг 2 ба 5 жилээр ялгаатай тогтоон “дадлагажигч” гэсэн нэр томьёог хасах ажээ. Эдгээр нэмэлт өөрчлөлт оруулсан хуулийн төслийг удахгүй засгийн газар УИХ-д өргөн барих юм байна.

“Дадлагажигч” нэрийг хална