УИХ-ын гишүүд “Ямаанд хайр зарласан” бас нэг хууль хэлэлцэж эхэллээ.

Төсвийн байнгын хорооны хуралдаанаар Ерөнхийлөгч Н.Энхбаярын санаачлан, боловсруулсан "Хувь хүний орлогын албан татварын тухай хуульд нэмэлт, өөрчлөлт оруулах тухай" хуулийн төслийг хэлэлцэн, чуулганы нэгдсэн хуралдаанаар оруулж хэлэлцэхээр дэмжлээ. Энэхүү хуулийн төсөлд ямааны угааж боловсруулаагүй түүхий ноолуурыг экспортоор гаргахад гаалийн татвар ногдуулахгүй байхыг тусгасан юм. Манай нийт малчин өрхийн 50 хувь нь ядуу өрхийн тоонд ордог гэсэн тооцоо байдаг аж. Харин малчны гар дээрээс борлуулж байгаа 1 кг түүхий ноолуураас 4000 төгрөгийн татвар авдаг юм байна. Тиймээс ингэж татварыг тэглэх хэлбэрээр санхүү, эдийн засгийн хямралаас үүдэн барааны үнэ өсөж, малын түүхий эдийн үнэ буурч байгаа энэ хүнд хэцүү үед малчдын амьжиргааг дэмжих нь зүйтэй хэмээн Ерөнхийлөгч үзжээ.

Монгол улс жилдээ 1900 тн ноолуур экспортлон, 7.9 тэрбум төгрөг татвараар төсөвт орж ирдэг юм байна. Харин энэ жил 11.9 тэрбум төгрөг орж ирнэ гэсэн төлөвлөгөөтэй байгаа юм байна. Хэрэв энэ хууль батлагдвал төсөв орж ирэх энэ 10 гаруй тэрбум төгрөгийг яаж нөхөх вэ гэдэг асуудал гарч ирэх юм. Гишүүд энэ талаар асуухад Сангийн яам гадаадын зээл, тусламжаар нөхөх боломжтой хэмээн хариуллаа.
ХХАХҮЯ-ынханы хэлж байгаагаар дундаж малчин өрх жилд ойролцоогоор 40 орчим мянган төгрөг төсөвт төлдөг байна.

Ц.Сэдванчиг “малчдын гар дээр одоо ноолуур байхгүй, тэд ямаагаа аль эрт самначихсан. Тэгэхээр энэ арга хэмжээ цаг хугацааны хувьд хоцорсон. Одоо бол үр дүнг нь малчид бус ченжүүд, хятадууд хүртэнэ. Үүнээс үүдэн ноолуурын үнэ өснө гэж найдах хэрэггүй” гэлээ. Харин гишүүн Ч.Улаан “Одоо малчдад ноолуур байхгүй гэж хэлж болохгүй. Хүүхдээ сургуульд явуулах, өөрсдөд нь амин чухал хэрэгцээ гарвал зарцуулах гээд хадгалсан байдаг. Тиймээс татварыг хөнгөлөх нь зүйтэй” гэсэн байр суурьтай байв.