Улаанбаатар хотын эмзэг бүлгийн хүн амын эрүүл мэндийн тусламж, үйлчилгээний хүртээмжийг сайжруулах” техник туслалцааны төслийг танилцуулах уулзалт 2009 оны тавдугаар сарын 26-ны өдөр ЭМЯ-нд боллоо.

Монгол Улсын Засгийн газар, Азийн хөгжлийн банктай хамтран 2008-2012 онд дөрвөн жилийн хугацаатай хэрэгжих энэхүү техник туслалцааны төсөл нь эмзэг бүлгийн хүн ам эрүүл мэндийн тусламж, үйлчилгээний хүртээмжийг хязгаарлаж байгаа хүчин зүйлсийг судалгаанд суурилан тодорхойлох, энэхүү үйлчилгээг хүртээмжтэй болгоход эрэлтэд суурилсан туршилтын 15 төслийг хэрэгжүүлэх, төр засгийн бодлогод нөлөөлөх санал боловсруулж Засгийн газарт өргөн барих гэх мэт хэд хэдэн зорилтыг дэвшүүлжээ.

Эхний ээлжинд нийслэлийн Сонгинохайрхан дүүрэг, Баянзүрх дүүргийн 21, 22, 23, 24 дүгээр хороод, Чингэлтэй дүүргийн 7, 19 дүгээр хороодод хэрэгжих энэ төслийн үр дүнд ойролцоогоор эмзэг бүлгийн 30 мянган хүн хамрагдаж, эрүүл мэндийн тусламж үйлчилгээний хүртээмж ялангуяа анхан шатны түвшинд хүрч сайжирсан байна гэж төсөл хэрэгжүүлэгчид тооцож байна. Нөгөө нэг үр дүн нь төсөлд хамрагдсан нийслэлийн дүүрэгт Хөгжлийн нийгмийн ажилтны хөтөлбөр амжилттай хэрэгжиж, шинэлэг 15 төсөл нь эмзэг бүлгийн иргэдэд үзүүлэх эрүүл мэндийн тусламж үйлчилгээ болон хүртээмжийг сайжруулна гэж үзэж байгаа ажээ.
Өнөөдөр ЭМЯ-д болсон “Улаанбаатар хотын эмзэг бүлгийн хүн амын эрүүл мэндийн тусламж, үйлчилгээний хүртээмжийг сайжруулах” техник туслалцааны төслийг танилцуулах уулзалтад НҮБ болон түүний төрөлжсөн байгууллагын төлөөлөгчид, Дэлхийн зөн Монгол, Адра, Мерси Корпус, Криистина Нобелийн сан, Зориг сан, Монголын эмэгтэйчүүдийн сан, Хүчирхийллийн эсрэг Үндэсний төв, Өсвөр үе-ирээдүй төв гэх мэт гадаад дотоодын байгууллагын төлөөлөгчид оролцож эмзэг бүлгийн хүн амтай ажиллаж байсан туршлагаа танилцуулж, цаашид энэхүү санал болгож байгаа төслийн хүрээнд хэрхэн яаж хамтран ажиллах талаар өөрсдийнхөө санал бодлыг хэлэв.