ИХ-аас энэ оны хоёрдугаар сарын 13-ны өдөр баталсан "Мэргэжлийн боловсрол, сургалтын тухай" хуулиар мэргэжлийн боловсрол, сургалтын талаархи төрийн бодлого, Засгийн газрын болон мэргэжлийн боловсрол, сургалтын үндэсний зөвлөлийн шийдвэрийг улсын хэмжээнд хэрэгжүүлэх чиг үүрэг бүхий төрийн захиргааны байгууллага байгуулахаар хуульчилсан билээ.
Хуулийн энэхүү заалтыг хэрэгжүүлэх үүднээс УИХ-ын гишүүн Ц.Даваасүрэн, З.Алтай, С.Бямбацогт, Д.Дондог, Ц.Сэдванчиг, А.Тлейхан нар Агентлаг байгуулах тухай УИХ-ын тогтоолын төслийг УИХ-ын дарга Д.Дэмбэрэлд өргөн барилаа.

Мэргэжлийн боловсрол, сургалтын асуудал хариуцсан төрийн захиргааны байгууллага байгуулагдсанаар мэргэжлийн боловсрол, сургалтын үйл ажиллагааг мэргэжлийн удирдлагаар хангаж, иргэдийн хөдөлмөр эрхлэх чадвар дээшлэн эрх нь баталгаажиж, үүний үр дүнд хүн амын ядуурлыг бууруулах, эдийн асгийн өсөлтийг хангана гэж төслийн танилцуулгад дурджээ. Түүнчлэн энэ талаар Засгийн газрын бүтцийн өөр өөр байгууллагад хуваагдсан чиг үүргийн давхардал, хомсдлыг арилгаж, хууль тогтоомжийг бүрэн хэрэгжүүлэх зохистой нөхцөл бүрдэх, мэргэжлийн боловсролын ангиллын үндэсний систем, ур чадварын стандарт, сургалтын арга зүйг хөдөлмөрийн зах, ажлын байрны бодит хэрэгцээ, шаардлагад нийцүүлэх ажлыг мэргэжлийн түвшинд тогтвортой хариуцан гүйцэтгэх, бүх төрлийн мэргэжлийн сургалтад нэгдсэн стандарт мөрдүүлэх тогтолцоо бүрдэх юм байна.