Өнөөдөр Монгол улсын ерөнхийлөгч Н.Энхбаяр сумо бөхийн түүхэнд шинэ дээд амжилтуудыг тогтоож, Монголын тамирчдын олимп, тив, дэлхийн тэмцээнд оролцох бэлтгэлийг хангах, амжилтыг нь ахиулахад бодитой дэмжлэг үзүүлж, Монголын өсвөр үе, залуучуудын дунд биеийн тамир, спортыг хөгжүүлэхэд оруулж байгаа үнэтэй хувь нэмрийг нь үнэлж Японы мэргэжлийн сумо бөхийн 68 дахь их аварга, “Такасаго” дэвжээний бөх “Асашёорюү” Долгорсүрэнгийн Дагвадоржид Монгол Улсын хөдөлмөрийн баатар цол хүртээж, Сүхбаатарын одон, “Алтан соёмбо” тэмдгээр тус тус шагналаа.

Мөн Японы мэргэжлийн сумо бөхийн ур чадварыг чадамгай эзэмшиж, дээд зиндаанд амжилттай барилдан түрүүлж спортын өндөр амжилт гаргасныг нь үнэлж мэргэжлийн сумо бөхийн Озаки, “Исэгахама” дэвжээний бөх “Харумофүши” Даваанямын Бямбадоржид Монгол Улсын гавъяат тамирчин цолоор шагналаа.