УИХ-ын дарга Д.Дэмбэрэл Монгол Улсын Ерөнхийлөгчийн зарлигаар төрийн алдар цол, одонгоор шагнуулсан төрийн түшээд, албаны зарим хүнд өнөөдөр шагналыг нь гардуулж, баяр хүргэлээ. Боловсролын байгууллагад олон жил тогтвор суурьшил, үр бүтээлтэй ажиллаж, олон мянган хүүхдийг сурган хүмүүжүүлж, боловсролын байгууллагын тогтолцоо, эрх зүйн орчинг зах зээлийн харилцаанд нийцүүлэн боловсронгуй болгох үйлсэд оруулсан хувь нэмрийг нь үнэлж УИХ дахь МАХН-ын бүлгийн ажлын албаны дарга Ш.Бадамд Монгол Улсын гавьяат багш, төрийн захиргааны болон банкны байгууллагад олон жил үр бүтээлтэй ажиллаж, Монгол Улсын эдийн засаг, төсөв, санхүү, мөнгөний бодлогыг боловсруулж хэрэгжүүлэх, төсөв, татварын хуулийг шинэчлэх, татварын шинэ тогтолцоог бүрдүүлэх, санхүү, банкны системийг хөгжүүлэхэд оруулсан хувь нэмрийг нь үнэлж ОХУ дахь Эдийн засаг, хамтын ажиллагааны олон улсын банкны орлогч дарга Д.Моломжамцад Монгол Улсын гавьяат эдийн засагч цол олгожээ. 

Мөн УИХ-ын гишүүн Д.Арвин, Д.Балдан-Очир, Ц.Цэнгэл, Ц.Шинэбаяр нарыг Хөдөлмөрийн гавьяаны улаан тугийн, С.Бямбацогт, Ж.Сүхбаатар нарыг “Алтан гадас”, Ä.Одбаярыг Цэргийн гавьяаны одонгоор шагнасан байна гэж УИХ-ын Хэвлэл мэдээлэл, сурталчилгааны хэлтэс мэдээлэв.