ОХУ-ын Екатеринбург хотноо өчигдөр эхэлсэн Шанхайн хамтын ажиллагааны байгууллагын гишүүн орнуудын төрийн тэргүүн нарын дээд хэмжээний уулзалтад Тэргүүн шадар сайд, Орос-Монголын Засгийн газар хоорондын комиссын Монголын хэсгийн дарга Н.Алтанхуяг тэргүүтэй төлөөлөгчид оролцож байна.

Монгол Улс 2004 онд Ташкент хотноо болсон Шанхайн хамтын ажиллагааны байгууллагын төрийн тэргүүн нарын уулзалтаар тус байгууллагын ажиглагчийн статустай анхны орон болжээ. Тус байгууллагын хүрээнд манай улс эдийн засгийн салбарын хамтын ажиллагаанд түлхүү оролцох сонирхолтой, эрчим хүч, дэд бүтэц, дамжин өнгөрөх тээврийг нэмэгдүүлэх чиглэлд илүү анхаардаг аж.

Монгол Улсын Ерөнхийлөгчийн тусгай төлөөлөгч, Монгол Улсын Тэргүүн шадар сайд Н.Алтанхуягтай өнөөдөр ОХУ-ын Аюулгүй байдлын зөвлөлийн нарийн бичгийн дарга Н.П.Патрушев, ОХУ-ын Гадаад хэргийн сайд С.В.Лавров нар уулзаж хоёр улсын харилцааны асуудлаар найрсаг ярилцав.

Уулзалтад Монгол Улсаас ОХУ-д суугаа Онц бөгөөд Бүрэн эрхт Элчин сайд Л.Хангай, ГХЯ-ны Стратегийн төлөвлөлт, хяналт-шинжилгээ, үнэлгээний газрын захирал Г.Батжаргал, ОХУ-ын Гадаад хэргийн яамны АСЕАН болон нийт Азийн асуудлын газрын захирал Б.М.Хакимов нар байлцав.