Монгол Улсын Ерөнхийлөгчийн 2008 оны 191 дүгээр зарлиг, Засгийн газрын 272 дугаар тогтоолын дагуу Халх голын 1939 оны байлдааны ялалтын 70 жилийн ойг энэ оны наймдугаар сард улс орон даяар тэмдэглэхээр бэлтгэж байгаа билээ. Иймээс “Халх голын 1939 оны байлдааны ялалтын 70 жилийн ойн дурсгалын медаль бий болгох тухай” УИХ-ын тогтоолын төслийг Засгийн газраас санаачлан боловсруулсныг УИХ-ын гишүүн, Батлан хамгаалахын сайд Л.Болд өнөөдөр УИХ-ын дарга Д.Дэмбэрэлд өргөн барилаа.

Ойд бэлтгэх, тэмдэглэн өнгөрүүлэх тухай Засгийн газрын тогтоолд “Халх голын байлдааны ялалтын 70 жилийн ойн медаль” бий болгохоор заасны дагуу ойн дурсгалын медалийн эх загварын уралдаанд ирүүлсэн бүтээлүүдийг Батлан хамгаалахын сайдын зөвлөлийн хурлаар хэлэлцээд Засгийн газрын хуралдаанд оруулж хэлэлцүүлэхээр шийдсэн юм байна. Ойн медаль бий болгох зардлыг энэ оны батлагдсан төсөвтөө багтаан шийдвэрлэх боломжтой гэж үзэж байгаа аж.

Халх голын байлдааны ялалтын түүхэн ойн арга хэмжээнүүдэд төр, засгаас онцгойлон анхаарч тэгш ойн жил бүр ойн дурсгалын медаль, тэмдэг бий болгон уг байлдаанд оролцож явсан ахмад дайчид, манай орны эрх чөлөө, тусгаар тогтнолыг хамгаалахад тэмцэж явсан Зөвлөлтийн зэвсэгт хүчний дайчдыг шагнадаг уламжлалтай байжээ. Тухайлахад 1940 онд Улсын Бага Хурлын Тэргүүлэгчдийн тогтоолоор “Халх голын ялалтын дурсгалын тэмдэг”, 1969 онд БНМАУ-ын Ардын Их Хурлын Тэргүүлэгчдийн зарлигаар “Халх голын 1939 оны байлдааны ялалтын ойн дурсгалын медаль” бий болгож байсан аж.

Тодруулга: Өнгөрсөн оны эцсийн байдлаар Халх голын 1939 оны байлдаанд оролцсон 131 ахмад дайчин байна. Тэдний дийлэнх нь 90-ээс дээш насны ахмадууд юм гэж УИХ-ын Хэвлэл мэдээлэл, сурталчилгааны хэлтэс мэдээлэв.