-Тангараг өргөх ёслол 12.06 цагт УИХ-ын танхимд эхэлнэ. Энэ цагт УИХ-ын дарга Д.Дэмбэрэл УИХ-ын нэгдсэн чуулганыг нээнэ.

-Тангараг өргөсний дараа Ц.Элбэгдорж төрийн туг, далбаанд хүндэтгэл үзүүлээд өөрийн ширээний ард ирэхэд Н.Энхбаяр тамгаа гардуулна. Үүний дараа төрийн дуулал эгшиглэнэ.

-УИХ-ын дарга шинэ Ерөнхийлөгчид баяр хүргэнэ. Үүний дараа Монголын бурхан шашны төвийн тэргүүн, Гандантэгчилэн хийдийн хамба лам Д.Чойжамц хадаг, сүү өргөн барьж баяр хүргэнэ. Ингэснээр шинэ Ерөнхийлөгч Ц.Элбэгдорж ард түмэндээ хандан үг хэлнэ. Үүгээр тангараг өргөх гол ажиллагаа дуусна.

-Тангараг өргөсний дараа Ерөнхийлөгч есөн хөлт цагаан тугандаа хүндэтгэл үзүүлээд Ерөнхийлөгчийн ажлыг албан ёсоор хүлээн авна. Энэ үеэр УИХ-ын дарга, Ерөнхий сайд нар түүнд баяр хүргэх юм. Үүний дараа Ц.Элбэгдорж уригдан ирсэн гадаадын зочид төлөөлөгчидтэй уулзаж тэд Ерөнхийлөгчид баяр хүргэнэ.

-13.25 цагт Сүхбаатарын талбай руу гарч тусгай зассан индэр дээр гарангуут цэргийн анги нэгтгэл байраа эзэлсэн байна. БХЯ-ны Жанжин штабын орлогч дарга, генерал рапорт өргөнө. Рапорт өргөсний дараа Ерөнхийлөгч цэргийн анги нэгтгэлийн өмнүүр явж мэндчилнэ. Буцаж индэр дээрээ гараад товч үг хэлнэ. Үг хэлж дуусангуут цэргийн парад явна. Энэ үйл ажиллагаа 13.50 цагт дуусах юм.

-14.00 цагт Соёлын төв өргөөнд хүндэтгэлийн концерт нэг цаг 30 минут үргэлжилнэ. Үүнээс хойш гадаадын хүндэт зочид, төлөөлөгчдийг хуваарийн дагуу ээлжлэн хүлээн авч уулзана. Сүхбаатарын талбайд 11.00-14.00 цагийн хооронд том дэлгэц байрлуулж тангараг өргөх бүх үйл ажиллагааг олон түмэнд толилуулна. Сүхбаатарын талбайд 30 минутын концерт болно.