УИХ дахь Ардчилсан намын бүлэг өнөөдөр хаалттай хуралдасан юм.
 Энэ талаар УИХ дахь Ардчилсан намын бүлгийн дарга Ч.Сайханбилэг сэтгүүлчдэд мэдээлэл хийв.

Ардчилсан нам нь өнөөдрийн бүлгийн хуралдаанаар таван асуудлыг авч хэлэлцлээ. Нэгдүгээр асуудал нь Нийгмийн даатгалын үндэсний зөвлөлийн бүрэлдэхүүнд шинээр хоёр хүн томилох тухай байлаа, тэднийг томилох нь зүйтэй гэдэг дээр санал нэгдсэн. Мөн Халх голын ялалтын 70 жилийн ойн медаль бий болгох тухай УИХ-ын тогтоолын төслийг зарчмын хувьд дэмжсэн. Түүнчлэн гурван чухал асуудал хэлэлцсэний эхнийх нь УИХ-ын 2008 оны 47 дүгээр тогтоол буюу эргэн төлөгдөх нөхцөлтэйгээр барьж байгуулах дэд бүтцийн ажлуудыг хэрхэн шийдвэрлэх вэ гэдэг дээр Засгийн газраас УИХ-ын тогтоолын төсөлд өөрчлөлт оруулах санал орж ирсэн. Уг тогтоолын төслийг хэлэлцэх нь зүйтэй гэдэг дээр бүлгийн гишүүд тогтлоо. Одоогийн нөхцөлөөр 49 дүгээр тогтоолд зааснаар нэр бүхий обьектуудад хувийн хэвшлийн хөрөнгө оруулалт хийхэд маш хүнд нөхцөлтэй. Нэгдүгээрт, эргэн төлөгдөх нөхцөл нь хугацааны хувьд маш удаан. Тооцох хувь хэмжээ нь хүндрэлтэй байгаа учраас энэ хувь хэмжээ, хугацааны асуудлыг зөөлрүүлж, Засгийн газарт илүү уян хатан ажиллах боломж олгох үүднээс тогтоолын төслийг хэлэлцэх нь зүйтэй гэж үзсэн. Бас 47 дугаар тогтоолд багтсан обьектуудын жагсаалтад энэ удаад УИХ өөрчлөлт оруулах шаардлагагүй гэж үзсэн. Харин 47 дугаар тогтоолтой холбогдуулаад дулааны улиралд амжуулах ёстой ажлыг шуурхайлуулах ёстой юм гэдэг дээр бүлгийн гишүүд санал гаргасан. Мөн анхаарах ёстой асуудал нь төр, хувийн хэвшлийн түншлэлийн зарчимд үндэслэж хийгддэг эрх зүйн орчныг бүрдүүлсэн хуулийн төслийг яаралтай өргөн барих нь зүйтэй гэж үзсэн. Энэ дагуу УИХ-аас түр хороо байгуулсан, түр хороо нь Засгийн газарт уг хуулийн төслийг өргөн барих ёстой байгаа.

-Төмөр замын өнөөгийн байдлын талаар Зам тээвэр, барилга хот байгуулалтын сайд мэдээлэл хийсэн гэсэн. Энэ тухай тодруулбал?

-Төмөр замд ямар хөрөнгө оруулалт хийх шаардлагатай, аль улсыг стратегийн хамтрагчаа болгох, шинээр байгуулах төмөр замын маршрутыг хаагуур тогтоовол Монгол Улсын ирээдүйн хөгжил, уул уурхайн салбарын хөгжилтэй уялдах вэ. Хэчнээн хугацаанд энэ хөрөнгө оруулалтыг хийх, хэдий хэмжээний хөрөнгө шаардагдах вэ гэсэн чухал мэдээллийг хаалттай хуралдаанаар хэлэлцсэн. Шийдвэрлэх шаардлагатай хэд хэдэн асуудлууд байгаа учраас Ардчилсан намын бүлгээс арван хүний бүрэлдэхүүнтэй ажлын хэсэг байгуулсан. Ажлын хэсгийг Н.Батбаяр гишүүн ахална. Ажлын хэсгийнхэн маань Зам, тээвэр барилга хот байгуулалтын сайдтай хамтарч төмөр замын ирээдүйн асуудлыг төлөвлөж, боловсруулсны дараа Засгийн газар, Үндэсний аюулгүй байдал, УИХ-д танилцуулж, энэ салбарын хөгжлийн асуудлыг цогцоор нь оруулж ирэх нь зүйтэй гэдэг дээр бүлгийн гишүүд санал нэгдлээ. Дараагийн чухал асуудал нь Монгол Улсын төрөөс цацраг идэвхт бодис болон цөмийн энергийн талаар баримтлах бодлого батлах тухай УИХ-ын тогтоолын төсөл юм. Энэ асуудалтай холбогдуулж Мон Атом компанийн ерөнхий захирал Р.Бадамдамдин, гүйцэтгэх захирал н.Цогтсайхан нарын мэдээллийг сонссон. Бүлэг бас хаалттай хэлэлцсэн. Мэдээллийн өнцөг нь цөмийн энергийн талаар баримтлах төрийн бодлоготой уялдуулж, удахгүй өргөн барих хуулийн төсөлд ямар асуудал тусгах гэж байна вэ гэдгийг бүлгийн гишүүд уг ажлыг хариуцаж байгаа хүмүүсээс нь сонсч, мэдээлэл авлаа.

-Нөхөн сонгуулийг ирэх намраас хийх тухай яригдаж байна. Энэ тухай танай намын бүлэг тодорхой шийдвэр гаргасан уу?

-Нөхөн сонгуулийг өнгөрсөн долоо хоногийн бүлгийн хуралдаанаар ярилцсан. УИХ-ын удирдлагын төвшинд бас ярьсан байгаа. Нөхөн сонгууль зуны амралтын үед таарсан учраас намар хийх нь илүү оновчтой гэж үзсэн л дээ.

-Эх орны хишиг, Эрдэнийн хувь хоёрыг нэгтгэх тухай асуудал хөндөгдөж эхэллээ. Тэгэхээр иргэн бүрт өгөх мөнгөний хэмжээ өсөх үү?

-Ямар ч байсан хоёр намын бүлгээс боловсруулсан хуулийн төсөлд тусгагдсан заалтуудыг аль алиныг багтаах ёстой ёстой гэсэн үндсэн тохиролцоо буюу ойлголцол байгаа.