ЮНЕСКО-ийн соёлын асуудал эрхэлсэн орлогч ерөнхий захирал хатагтай Франсуа Ривьер долдугаар сарын 11-17-ны өдрүүдэд Монгол Улсад айлчилж байна.

Хатагтай Франсуа айлчлалынхаа хүрээнд Үндэсний их баяр наадмын нээлтийн ажиллагааг үзэж, мөн Орхоны хөндийн соёлын дурсгалууд, Эрдэнэ зуу хийд, Эртний Хархорум хотын туурь, Занабазарын нэрэмжит Дүрслэх урлагийн мүзей, Нүүдэлчдийн соёл иргэншил судлалын олон улсын хүрээлэн зэрэг газруудад зочилж үйл ажиллагаатай нь танилцсан байна.
Тэрбээр өнөөдөр Монгол Улсын Ерөнхий сайд С.Баярт бараалхаж, Монголын талаас монгол тууль, монгол биелгээ, монгол цуурь хөгжмийг Дэлхийн биет бус соёлын өвд бүртгүүлэхээр ЮНЕСКО-д оруулсан хүсэлтийн талаар санал солилцлоо.
Ерөнхий сайд С.Баяр Монгол Улс болон ЮНЕСКО-гийн хамтын ажиллагаа амжилттай хөгжиж байгаад болон манай улсын боловсрол, соёл, шинжлэх ухааны салбар, эртний түүхийн дурсгалт газар, соёлын өвийг хамгаалах асуудалд онцгой анхаарч байдагт талархал илэрхийлэв.
Хатагтай Франсуа цаг гарган уулзсанд Ерөнхий сайдад хариу талархал илэрхийлээд Монголын талаас тавьсан саналыг яаралтай бүртгэж авах саналын ангилалд оруулсан тул ирэх есдүгээр сард хэрхэн шийдсэн талаар хариу мэдэгдэнэ гэлээ хэмээн Засгийн газрын Хэвлэл, мэдээллийн албанаас мэдээллээ.