Өнөөдөр Нийгмийн хамгаалал хөдөлмөрийн сайд Т.Ганди Баянзүрх, Хан-Уул дүүрэгт ажиллаж хоёр хоногийн өмнө орсон аадар борооны үерт өртөж, орон гэргүй болсон иргэдтэй уулзаж, үүссэн хохирлыг шуурхай арилгаж, зам болон газрын хөрсөнд тогтсон лаг шаварыг цэвэрлэн зайлуулах, ус соруулах ажилд тухайн дүүрэг хорооны ажилгүй, орлогогүй иргэдийг татан оролцуулсан нийтийг хамарсан ажлын байдалтай танилцлаа.

Нийтийг хамарсан энэхүү ажилд оролцсон иргэнд өдрийн зургаан мянган төгрөгийн цалинг өдөрт нь тооцон Хөдөлмөр эрхлэлтийг дэмжих сангаас олгох бөгөөд одоогийн байдлаар Баянзүрх дүүрэгт 750 хүнийг уг ажилд оролцуулахаар төлөвлөөд байна. Хан-Уул дүүрэгт 270 гаруй хүн лаг шавар цэвэрлэх, ус соруулах, зам сэргээх ажилд оролцож байна.

Нийгмийн хамгаалал хөдөлмөрийн яам харьяа дүүргийн хөдөлмөр халамжийн үйлчилгээний хэлтсүүдээр дамжуулан байгалийн гамшигт өртсөн иргэдийг бичиг баримтжуулах зардлыг халамжийн сангаас гаргах, ирэх наймдугаар сарын тэтгэмжийг урьдчилан олгохоор шийдвэрийг гаргалаа. Түүнчлэн Нийгмийн хамгаалал хөдөлмөрийн яамнаас хэрэгжүүлдэг Хүнс тэжээлийн дэд хөтөлбөрөөс орон гэргүй болсон иргэдэд халуун хоолоор 5-7 хоног үйлчлэхээр болсон.

Одоогийн байдлаар нийслэл хотын хэмжээнд 126 айл орох орон гэргүй болсноос 113 нь Баянзүрх дүүрэгт байгаа ажээ. Харин Хан-Уул дүүргийн Биокомбинатад 500 өрх их бага хэмжээгээр үер өртсөнөөс 41 өрхөд нэлээд их хэмжээний хохирол учирсан бол эдгээр өрхийн 15 нь огт орох оронгүй болжээ.

Урьдчилсан байдлаар 117 өрхийн 540 гаруй иргэн иргэний бичиг баримтгүй болсон байна. Эдгээр иргэдийг бичиг тухайн дүүрэг хорооны өрхийн дэвтрийг нь үндэслэн яаралтай бичиг баримтжуулах ажлыг зохион байгуулахаар болсон байна.

Баянзүрх дүүрэгт байгаа орон гэргүй иргэдийг түр хугацаагаар Батлан хамгаалахын их сургууль, Цэргийн их сургуулийн байруудад байршуулах арга хэмжээг авч эхэллээ.

Нийгмийн хамгаалал хөдөлмөрийн сайд Т.Ганди ажлын явцтай танилцах үеэр дүүргүүдийн хөдөлмөр халамжийн үйлчилгээний хэлтсийнхнийг хангалтгүй ажиллаж, өөрсдөө иргэдийн дунд орж зохион байгуулалтайгаар түргэн шуурхай ажиллаж чадахгүй байгааг зэмлэж, хүүхэд ахмад настан, биеэ авч явах чадваргүй иргэдэд гол анхаарлаа хандуулах, байгалийн гамшиг болсон газар нутагт байнга ажиллаж, үнэн зөв мэдээлэл өгч ажиллахыг анхаарууллаа гэж Нийгмийн хамгаалал, хөдөлмөрийн яамнаас мэдээллээ.