Нийслэлд улсын төсвийн 17.9 тэрбум төгрөгийн хөрөнгөөр 65 ажил хийгдэж байна. Үүнээс 51 нь энэ жил шинээр хийгдэж байгаа юм. Үүний 38 нь тендер зарлагдаад ажил эхэлсэн бол 13 нь бэлтгэлээ хангаж байна. Харин нийслэлийн төсвийн 20.8 тэрбум төгрөгөөр 151 ажил хийгдэх ба 35 нь он дамжиж байгаа аж.

Хөрөнгө оруулалтыг салбар салбараар нь гаргаж үзье. 800 гаруй сая төгрөгөөр 16 төрлийн ажлыг боловсролын салбарт, эрүүл мэндэд 1.5 тэрбум төгрөгөөр 22 ажил хийгдэж байна. Харин хүн бүрийн анхаарлын төвд байдаг зам засварт 10.8 тэрбум төгрөгийг зарцуулж байгаа аж. Энэ жил 45 сургууль, 38 цэцэрлэгт засвар хийгдэх ёстой. Үүнээс 41 нь ажлаа дуусгасан бол 33 нь засварын ажил явагдаж, 9 нь эхлээгүй байна. Улаанбаатар хотын Захирагчийн Ажлын Албаны харьяа ОСНААУГ, УСУГ, дулаан, цахилгаан зэрэг мэргэжлийн байгууллагын өвөлжилтийн бэлтгэл 79.9 хувьтай байгаа ба аравдугаар сар гэхэд бүх ажил дуусах тооцоо гарчээ.