Улсын Их Хурлын эрхэм гишүүд ээ !

Улсын Их Хурлын энэ удааг
ийн ээлжит бус чуулган төлөвлөсөн асуудлаа бүрэн хэлэлцлээ. Стратегийн орд газрыг ашиглахтай холбогдуулан Засгийн газраас өргөн мэдүүлсэн уул уурхайн зарим бүтээгдэхүүний үнийн өсөлтийн албан татварыг тодорхой хугацааны дараа хүчингүй болсонд тооцох, аж ахуйн нэгжийн орлогын албан татварын болон усны, мөн авто замын тухай хуульд нэмэлт, өөрчлөлт орууллаа. Монголчууд бидний ирээдүйн хөгжлийн дүр төрхийг тодорхойлоход онцгой ач холбогдол бүхий “Оюу толгой” ордыг ашиглах хөрөнгө оруулалтын гэрээг байгуулж ажиллах эрх зүйн орчныг Улсын Их Хурал бүрэн бүрдүүлж өглөө.

Засгийн газарт уг гэрээг Улсын Их Хурлаас өгсөн чиглэлийн дагуу байгуулах хариуцлагатай зорилт ногдож үлдлээ. Энэхүү гэрээний цаана улс орны болон ард түмний амин чухал асуудал байгаа учраас эрдэмтэн, мэргэжилтэн, төрийн бус байгууллагын зүгээс гаргаж байгаа үр ашигтай, бүтээлч саналыг Засгийн газар харгалзан үзэх нь мэдээж ээ.

Үнийн өсөлтийн татварыг хүчингүй болгох нь үйлдвэрлэгчид, хөрөнгө оруулагчид болон банк, уул уурхай зэрэг мэргэжлийн байгууллагын удаа дараагийн санал хүсэлтэд нийцэж буй нь ойлгомжтой. Энэ татвар улс орны нийгэм, эдийн засгийн зарим асуудлыг шийдвэрлэхэд чухал хувь нэмэр оруулсан юм. Санхүү, эдийн засгийн хүндрэлтэй өнөө үед гэнэтийн ашгийн татварыг орлох орлогын эх үүсвэрийг, тухайлбал, нөөц ашигласны төлбөрийг шатлалтайгаар нэмэгдүүлэх, уул уурхайн үйлдвэрлэлийн үр ашгийг дээшлүүлэх замаар дутагдах хөрөнгийг бүрдүүлэхийг Засгийн газар судалж, шийдвэрлүүлэх шаардлагатай гэж Улсын Их Хурлын гишүүд санал гаргасныг тэмдэглэж байна.

Авто замыг зөвхөн улсын төсвийн болон замын сангийн хөрөнгөөр санхүүжүүлж байсныг бусад эх үүсвэрээр санхүүжүүлэх боломж нээгдлээ. Энэ нь олон улсын болон улсын хэмжээний ач холбогдолтой томоохон ордуудыг гадаад, дотоодын зах зээлтэй холбох, улсын авто замын нэгдсэн сүлжээг өргөжүүлэх ач холбогдолтой юм.

Аж ахуйн нэгжийн орлогын албан татварын хуулиар тайлант жилд гарсан алдагдлыг ирээдүй цагийн зардалд шилжүүлэн тооцох хугацааг уул уурхайн салбарын хувьд тухайн салбарын үйл ажиллагааны онцлогийг харгалзан 8 хүртэл жил болгон уртасгав. Засгийн газрын мэдээлснээр уул уурхайн салбарт үйл ажиллагаа явуулж байгаа 110 аж ахуйн нэгж 2008 онд 51,9 тэрбум төгрөгийн алдагдлыг тайландаа тусгасан байна. Аж ахуйн нэгжийн орлогын албан татварын хуулийн энэ удаагийн өөрчлөлттэй нийцүүлэн Засгийн газар Ашигт малтмалын тухай хуулийн холбогдох заалтыг өөрчлөх саналаа Улсын Их Хуралд оруулах нь зүйтэй.

Ээлжит бус чуулганаар санхүү, эдийн засгийн хүндрэлийг даван туулах талаар авч хэрэгжүүлж байгаа арга хэмжээний талаар Монголбанкны Ерөнхийлөгч, Сангийн сайд нарын мэдээллийг сонслоо. Мэдээллээс болон Улсын Их Хурлын гишүүдээс гаргасан саналаас үзэхэд юуны өмнө банк, санхүүгийн тогтвортой байдлыг хангах нь нэн чухал шаардлагатай болох нь харагдав. Санхүү, эдийн засгийн хүндрэлийг давах талаар Монголбанк Засгийн газартай хамтран ажиллах хэрэгтэй байна. Энэ талаар Улсын Их Хурал дараах чиглэлийг Засгийн газар, Монголбанканд өгч байна.

Эдийн засгийн уналтыг зогсоож, өсөлт бий болгох, төсвийг бүрдүүлэх, банкны зээлийн үйл ажиллагааг идэвхжүүлэх, тэр дундаа барилгын салбарт илүү анхаарал тавих, банкны салбарын бүтцийг боловсронгуй болгох, арилжааны банкуудад хөндлөнгийн хяналт хийлгэж зээлийн багц, хөрөнгийн чадавхид үнэлэлт дүгнэлт өгөх талаар тодорхой арга хэмжээг цаг алдалгүй авч хэрэгжүүлэх нь зүйтэй гэж Улсын Их Хурал үзлээ.

Ирэх намрын чуулганаар мөнгөний бодлого, төсвийн төсөл, үндсэн чиглэлийг хэлэлцэх үед татварын болон банкны үйл ажиллагаатай холбоотой хуулиудийг иж бүрнээр авч үзэж, эрх зүйн орчныг улам боловсронгуй болгох асуудлыг хэлэлцэн шийдвэрлэх болно. Улсын Их Хурлын эрхэм гишүүд ээ, Улсын Их Хурлын ээлжит бус чуулганы ажиллагаа өндөрлөснийг мэдэгдье