Шалгалт эхлэх гэж хэдэн өдөр, томилогдох гэж хэдэн сар яригдсан төрийн албан хаагчдын асуудлыг энэ долоо хоногт цэгцэлж дуусгах нь. Нийслэл, дүүргийн төрийн албан хаагчийн томилгоо хэтэвчний зузаанаар шийдэгдэх гэж нэлээд хугацаа барсан ч "Хамгийн өндөр оноо авсан хүнийг томилно. Хууль бус томилгоо хийсэн хүнтэй хариуцлага тооцно" гэж хотын удирдлагууд хатуухан ярьсны дараа томилгоо хийгдэж дуусах шатандаа оржээ.

Баянгол, Чингэлтэй, Сүхбаатар, Багануур дүүргүүд зарлагдсан бүх ажлын байрт албан хаагчдыг томилж дууссан бол Сонгинохайрхан дүүрэгт Хүний нөөц, ёсзүйн асуудал хариуцсан мэргэжилтэн, Санхүү төрийн сангийн мэргэжилтний орон тоо хүлээгдэж байна. Мөн Баянзүрх дүүрэгт Хүүхэд залуучуудын асуудал хариуцсан мэргэжилтэн, Багахангай хорооны зохион байгуулагчаа томилоогүй аж. "Төрийн албан хаагчийн томилгоонд эргэлзэх хэрэггүй. Энэ долоо хоногт томилгоог дуусгахыг хотын орлогч анхааруулж байв. Харин томилгоо хийгээгүй удирдах албан тушаалтанд арга хэмжээ авна гэсэн үг хүчинтэй хэвээр байгааг сануулав.