Мэргэжлийн хяналтын газраас 21 аймаг, нийслэлийн төвийн 6 дүүрэг, НДЕГ-ын /Нийгмийн даатгалын ерөнхий газар/ нийгмийн даатгалын сангуудын 2007, 2008 оны баримтуудыг хамруулж, нийгмийн даатгалын сангаас олгогдож буй тэтгэвэр, тэтгэмжийн бүх хувийн хэрэгт тооллого хийж, тогтоолтын үндэслэлийг тэтгэврийн хувийн хэргийг шалгах замаар хэрэгжүүлсэн байна.

Тэтгэвэр тэтгэмжийн тогтоолт, олголтын үндэслэлийг шалгах ажлыг Иргэний бүртгэл мэдээллийн байгууллага, банк, архивын байгууллагатай холбогдон гүйцэтгэсний дээр , хороо багт хүрч ажилласан ажээ.

Нийгмийн даатгалын байгууллагууд нийгмийн даатгалын шимтгэлийн орлогын төлөвлөгөөг 5 сангийн төрөл тус бүрээр давуулан биелүүлж татвар төлөгч ААНБ-ын 80-аас доошгүй хувийг нийгмийн даатгалд хамруулсан зэрэг ололт амжилттай ажиллаж байна.

Монгол Улсын Засгийн газрын 2008 оны 355 дугаар тогтоолын дагуу нийт тэтгэвэр авагчдын хувийн хэргийг нэг бүрчлэн үзэж өөрчлөлтийг цаг хугацаанд нь чанартай хийж гүйцэтгэснээр Засгийн газрын тогтоол шийдвэрийг тухай бүрт нь биелүүлжээ. Мөн дотоодын хяналтыг бий болгосноор тэтгэвэр тэтгэмж тогтоолтын үндэслэл, ажил олгогчид тавих хяналт дээшилж, шимтгэл төлөлт, орлогын бүрдүүлэлтэнд эерэг нөлөө үзүүлсэн байна.
Нийгмийн даатгалд хамрагдалтыг жилээс жилд нэмэгдүүлэх тал дээр анхаарч ажилласнаар тодорхой үр дүнд хүрсэн зэрэг сайшаалтай дүнгүүд гарсан байна.

Харин шалгалтын явцад дараах зөрчил дутагдал илэрчээ. 

Нийгмийн даатгалын ерөнхий газраас нийгмийн даатгалын сангийн хөрөнгийг арилжааны банкуудын хадгаламжийн жилийн дундаж хүүгээс доогуур хүүтэйгээр хадгалуулсан. Нийгмийн даатгалын сангийн хөрөнгийг сан хооронд шилжүүлэн зарцуулсан, зориулалтын бус чиглэлээр ашиглан, байршуулсан зөрчил давтагдсаар байна.
Мөн нийгмийн даатгалын байцаагч нарын нийгмийн асуудлыг шийдвэрлэхэд ихээхэн хэмжээний мөнгийг хавтгайруулан олгожээ. Ажилтнуудад олгож буй орон сууцны үнийн хөнгөлөлт 1,5-10,0 сая төгрөг хүртэл харилцан адилгүй хэмжээтэй олгогдсон байна.

Баян-Өлгий, Булган, Төв аймаг Баянзүрх, Чингэлтэй дүүргийн Нийгмийн даатгалын хэлтсүүд нийгмийн даатгалын сангийн хөрөнгийн 11,5 сая төгрөгийг зориулалт бусаар зарцуулсан бол Баян-Өлгий, Булган, Говь-Алтай, Говьсүмбэр, Ховд, Хөвсгөл, Хэнтий аймаг, Хан-Уул, Сүхбаатар, Сонгинохайрхан дүүргүүдэд нийт 104 тэтгэвэр тэтгэмж авагчдад 15,6 сая төгрөгийн тэтгэвэр тэтгэмжийг илүү олгож сангийн хөрөнгийг үрэлгэн зарцуулсан байна.