УИХ-ын нөхөн сонгуульд өрсөлдөх намуудын нэр тодорсон ч, намуудаас нэр дэвшигчдийн нэр хараахан тодроогүй байна. Энэ долоо хоногтоо багтан ирэх даваа гариг гэхэд нэр дэвшигчдийн нэрс олон нийтэд тодорхой болох бололтой. УИХ-ын 24-р тойргийн нөхөн сонгуульд 9 нам нэр дэвших хүсэлтээ СЕХ-д гаргаснаас Б.Жаргалсайханы нам /БНН/, М.Энхсайханы нам /ҮШН/ зэргийн 3 намыг нэр дэвших эрхгүй хэмээн, 6 намд нэр дэвших эрх өгсөн билээ.

Тэдгээр 6 нам маргаашаас эхлэн тус тусын хуралдаанаар хэлэлцэн нэр дэвшигчдээ тодруулах ажээ. МАХН-ын бага хурал, АН-ын Үндэсний зөвлөлдөх хороод ирэх 25-ны өдрүүдэд хуралдаж нэр дэвшигчдээ тодруулах бол, Эрх чөлөөг хэрэгжүүлэгч намын Боловсруулан зөвлөлдөх хороо 24-нд, МУНН-ын бага хурал 26-нд, ИЗН-ын үндэсний хороо, Монголын Ардчилсан хөдөлгөөний намын бүгд хуралууд 27-ны өдөр хуралдаж, тус тусын нэр дэвшигчдээ тодруулах юм байна.