Хөвсгөл аймгийн Ренчинлхүмбэ, Улаан-Уул, Цагаан-Уул сумыг төвийн эрчим хүчний нэгдсэн системд холбожээ. Энэ талаар Эрдэс баялаг, эрчим хүчний яамны Эрчим хүчний бодлогын газрын мэргэжилтнүүдээс тодрууллаа.
-Өнгөрсөн оноос нийслэлийн эрчим хүчний барилга угсралтын инженер, техникийн ажилчид 3000 орчим төмөр, бентонон тулгуур шон босгож, өндөр хүчдэлийн шугам татсан. Ингэснээр Хөвсгөл аймгийн Ренчинлхүмбэ, Улаан-Уул, Цагаан-Уул сумыг төвийн эрчим хүчний нэгдсэн системд холбоод байна. Алаг-Эрдэнэ сумаас Улаан –Уул хүртэл 165 км, тэндээс Ренчинлхүмбэ 78 км, Ренчинлхүмбээс Цагаан-Уул сум руу 45 км-ын урттай өндөр хүчдэлийн шугам татаж төвийн эрчим хүчинд холбогдлоо.

-Төвийн энэ ажилд хэдий хэмжээний хөрөнгө зарцуулав.

- Энэ ажлыг Нийслэлийн эрчим хүчний барилга угсралтын трестийнхэн гүйцэтгэсэн. Шон босгох, хүчлийн шугам татахад нийт 2,8 тэрбум орчим төгрөг зарцууллаа.

-Цаашид ямар сумыг холбохоор төлөвлөж байна. Одоо өндөр хүчдэлд холбогдоогүй хэдэн сум монгол байна вэ.

-Манай улсын нийт 307 сумын 273-ыг нь одоогоор өндөр хүчдэлд холбогдоод байна. Үлдсэн нь төвийн эрчим хүчнээс алслагдсан сумд байгаа. Төсөв мөнгө нь шийдэгдчихвэл ойрын хугацаанд холбогдох төлөвлөгөөтэй. Хөвсгөл аймгийн хувьд Цагааннуураас бусад сумын өндөр хүчдэлд холбогдсон. Удахгүй Цагааннуур холбогдоно.