Турк Улсын Төрийн албан хаагчдын үйлдвэрчний эвлэл /MEMUR-SEN/-ийн холбооны төлөөлөгчид МҮЭ-ийн холбооны үйл ажиллагаатай танилцаж, харилцан туршлага солилцох хамтын ажиллагааны хүрээнд энэ сарын 10-13-ны өдрүүдэд манай улсад айлчилж байгаа билээ.

Энэ хүрээнд өнөөдөр (2022.02.11) МҮЭ-ийн холбооны Ерөнхийлөгч С.Эрдэнэбат, Ерөнхий нарийн бичгийн дарга Х.Буянжаргал, МБШУ-ны ҮЭ-ийн холбооны дарга З.Цогтгэрэл нар Турк улсын Төрийн албан хаагчдын үйлдвэрчний эвлэлийн холбоо (MEMUR SEN)-ны Хэвлэл мэдээлэл гадаад харилцаа хариуцсан дэд ерөнхийлөгч Мэхмэд Эмен Эсен, Хамтын хэлэлцээр, хууль эрх зүйн бодлого хариуцсан дэд ерөнхийлөгч Хаси Баяран Тонбул, Гадаад харилцааны зөвлөх Өгүр Муфтоугли нарыг хүлээн авсан юм.

Уулзалтын эхэнд МҮЭ-ийн холбооны Ерөнхийлөгч С.Эрдэнэбат МҮЭ-ийн холбооны товч танилцуулгыг хийж хоёр улсын үйлдвэрчний эвлэлийн байгууллагуудын найрсаг хамтын ажиллагаа олон жил амжилттай үргэлжилж байгаад талархаж буйгаа илэрхийлж, цаашид Монгол, Туркийн ҮЭ-үүдийн хамтын ажиллагаа шинэ шатанд гарч бүхий л салбарт өргөжин тэлж, бүс нутгийн хүрээнд тулгамдаж буй асуудалд хамтран дуу хоолойгоо нэгтгэж ажиллахад таатай байх болно гэлээ. Иймд хоёр улсын ҮЭ-ийн холбоод хөдөлмөр эрхлэлт, аялал жуучлал, хөдөлмөрчдийн боловсролын тал дээр хамтын ажиллагаагаа өргөжүүлэн хөгжүүлнэ гэдэгт итгэлтэй байна.

Турк улсын Төрийн албан хаагчдын үйлдвэрчний эвлэлийн холбооны дэд ерөнхийлөгчид: Саяхан болсон МҮЭ-ийн холбооны XXIII Их хурлаар сонгогдсон шинэ удирдлагын багт баяр хүргэж найрсаг дотно хүлээн авч уулзаж байгаад талархалаа илэрхийллээ. Мөн “Өнгөрсөн жилүүдэд манай хоёр улсын ҮЭ-ийн байгууллагууд сургалт, ОУ-ын хурлуудад харилцан төлөөлөгч нараа солилцож найрсаг хамтын ажиллагаагаа амжилттай үргэлжлүүлж ирлээ. Манай MEMUR SEN Төрийн албан хаагчдын ҮЭ-ийн холбоо нь Турк улсдаа Төрийн албан хаагчдын хамгийн олон гишүүнчлэлийг эгнээндээ нэгтгэсэн хамгийн том ҮЭ-ийн байгууллага юм. Манай хоёр улс түүхийн хувьд салшгүй холбоотой төдийгүй ахан дүүсийн барилдлагатай тул бидний зүгээс МҮЭ-ийн холбоотой үргэлж хамтран ажиллахдаа таатай байх болно. Мөн бид МҮЭ-ийн холбооны шинэ удирдлагын багийг хүссэн үедээ манай улсад айлчлахыг урьж байна" хэмээж хоёр улсын уламжлалт хамтын ажиллагаанд амжилт хүсч Турк улсад уулзах ерөөл өргөснөөр уулзалт өндөрлөлөө.

МҮЭ-ийн холбоо Турк улсын Төрийн албан хаагчдын үйлдвэрчний холбооны төлөөлөгчдийг хүлээн авлаа