Монгол Улсын эдийн засаг, нийгмийн хөгжлийн 2009-2014 оны стратеги төлөвлөгөөний тэргүүлэх чиглэлийн хүрээнд хэрэгжүүлэхээр төлөвлөсөн улс орны хөгжилд доривтой хувь нэмэр оруулах хөрөнгө оруулалтын төслүүдийг тодорхойлж, стратегийн ач холбогдолтой ашигт малтмалын орд газруудыг ашиглахтай холбогдуулан хөрөнгө оруулалтын томоохон төслүүдийг хэрэгжүүлж, улс орны хөгжилд шийдвэрлэх үүрэгтэй дэд бүтцийг хөгжүүлэхэд ихээхэн анхаарч дараах төслүүдийг дунд хугацаанд хэрэгжүүлэхээр төлөвлөөд байна.
Үүнд: төмрийн хүдрийг ашиглах хөрөнгө оруулалтын гэрээ байгуулж, төмрийн хүдрийг ашиглах уурхай, баяжуулах үйлдвэр байгуулна.

• Төмрийн хүдрийн баяжмалыг хайлах хар металургийн цогцолбор бариж, Асгатын мөнгөний ордыг ашиглаж, үйлдвэрийг барьж эхэлнэ.
• Төмөр замын тээх нэвтрүүлэх чадварыг нэмэгдүүлж төмөр замыг цахилгаанжуулах, төмөр замын хоёр дахь шугамыг барих төслийг хэрэгжүүлж, Зүүн бүсийн төмөр замын сүлжээг өргөтгөж эхэлнэ.
• Монгол Улсын эрчим хүчний нэгдсэн сүлжээ бий болж, Улаанбаатар хот эрчим хүчний шинэ эх үүсвэрээс цахилгаан, дулааныхаа хэрэгцээг хангана.
• Хөшигтийн хөндийд олон улсын нисэх онгоцны шинэ буудал баригдаж олон улсад хүлээн зөвшөөрөгдсөн нисэх буудалтай болно.
• Шивээ овоогийн нүүрсийг түшиглэн цахилгаан дамжуулах агаарын шугам цахилгаан станц ашиглалтад орж, эрчим хүч экспортлогч улс болно.
• Алтанбулаг-Замын Үүдийн авто замыг шинэчлэн хурдны замтай болж, “Мянганы зам” төслөөр аймгийн төвүүдийг нийслэл хоттой хатуу хучилттай авто замаар холбосноор, ард түмний амьдрал ахуй дээшлэнэ.
• Стратегийн орд газруудыг ашиглах болон улс орны хөгжилд шийдвэрлэх үүрэгтэй дэд бүтцийн сүлжээ бий болсон байна.
• Улаанбаатар хотод эрчим хүчний шинэ эх үүсвэрийг барина. Монгол Улсын эрчим хүчний нэгдсэн сүлжээг байгуулна.

Улсын Төсвийн хөрөнгө оруулалтын төлөвлөлтийн стратеги:

Дунд хугацааны хөрөнгө оруулалтыг төлөвлөхдөө өнөөгийн хүслийн жагсаалт гаргадаг арга хэлбэрийг өөрчилж, Засгийн газрын хөгжлийн стратегитай уялдуулан тэргүүлэх ач холбогдлоор нь дараалуулан хөрөнгө оруулалтын батлагдсан хөтөлбөрийн дагуу хөтөлбөрт суурилсан хөрөнгө оруулалтын төлөвлөгөөг боловсруулах хувилбар руу шилжих нь чухал байна.

Монгол Улсын эдийн засаг сүүлийн жилүүдэд тогтвортой өсч улсын төсвийн хөрөнгөөр хийгдэх хөрөнгө оруулалт жилээс жилд нэмэгдэж байгаагийн дээр “Монгол Улсыг хөгжүүлэх сан” байгуулагдаж, хөрөнгө оруулалтын шинэ эх үүсвэр бий болсноор улс орны бүтээн байгуулалт, хөгжлийн бодлогыг хэрэгжүүлэхэд ихээхэн ач холбогдолтой арга хэмжээ болсон.

Монгол улсыг хөгжүүлэх сангийн хөрөнгөөр хийгдэх хөрөнгө оруулалтын дийлэнх хэсэг нь эрчим хүч, зам, тээвэр, барилга, хот байгуулалтын чиглэлийн дэд бүтцэд зарцуулагдаж ирсэн ба цаашид энэ сангийн хөрөнгөөр дэд бүтцийн салбар болон үйлдвэрлэл, үйлчилгээг өргөтгөхөд зарцуулж, ажлын байр нэмэгдүүлэх, иргэдийн тохилог тайван амьдрах, сурч боловсрох орчинг бүрдүүлэхэд чиглэх хандлагатай байна. Цаашид Монгол Улсыг хөгжүүлэх санд төвлөрсөн хөрөнгийг Улсын эдийн засаг, нийгмийн хөгжлийн хурдацтай уялдуулан хөгжлийн чиг хандлагыг тодорхойлсон, тэргүүлэх чиглэлийн хөрөнгө оруулалтад чиглүүлэх нь зүйтэй байна.