Түүхэн аялал жуулчлалын бүтээн байгуулалтын зураг төслийн хэсэгт түүхч, эрдэмтэд, олон улсын Монгол судлаачдын төлөөллийн саналыг сонсохоор төлөвлөгөөт уулзалт зохион байгууллаа.

Түүхэн дурсгалт газруудыг илэрхийлэхдээ барилга байшин, хөшөөг гоё хэлбэртэй барихын тулд ихээхэн төсөв зарцуулж байгааг шүүмжилж, барихдаа "Түүхэн цаг үеийн ач холбогдол", "Өв соёл, зан заншил", "Аялал жуулчлал хөгжих цогцолбор" болон эргээд эдийн засгийн хувьд ашигтай байх агуулгаа сайтар анхаарах хэрэгтэйг онцоллоо. Ялангуяа XIII, XIV зууны хэв шинжийг агуулалгүй XXI зууны хэлбэрээр тухайн үеийг илэрхийлсэн агууламж бүхий барилга байшинг барихаас татгалзахыг санал болголоо.

Азийн хөгжлийн банкны харьяа Төв Азийн бүс нутгийн эдийн засгийн хамтын ажиллагааны /КАРЕК/ хөтөлбөрийн хүрээнд Алтайн аялал жуулчлалын кластер буюу Казахстан, Хятад, Орос, Монгол гэсэн дөрвөн улс орныг дамнасан аялал жуулчлалын кластер бий болгох ажил явагдаж байна.

Азийн хөгжлийн банкны зээл, дэмжлэгтэйгээр манай оронд “Тогтвортой аялал жуулчлал” төсөл хоёр үе шаттайгаар хэрэгжиж эхлээд байна. Эхний үе шат нь Хөвсгөл, Хэнтий аймагт түүхэн аялал жуулчлалыг хөгжүүлэх чиглэлээр хийх бүтээн байгуулалтын зураг төсөл боловсруулах ажил байв. Уг ажил үндсэндээ дууссан тул “Тогтвортой аялал жуулчлал-2” төсөл эхлэхэд бэлэн болжээ. Тус төслийн хүрээнд 2022 онд Хөвсгөл, Хэнтий аймагт тодорхой бүтээн байгуулалтуудыг эхлүүлж, баруун бүсийн буюу Увс, Ховд, Баян-Өлгий аймагт газар нутгийн онцлогийг түшиглэн аялал жуулчлалыг хөгжүүлэх ажлыг хийхээр шат дараатай төлөвлөгөөт ажлууд эхлэхэд бэлэн болоод байна.

Уг төслийн танилцуулга, хэрэгжүүлэх төлөвлөгөөтэй БОАЖ-ын сайд болон Соёлын сайд, Сангийн яамны албаны төлөөлөл танилцаж, санал солилцоод, түүхэн аялал жуулчлалын бүтээн байгуулалтын зураг төслийн хэсэгт түүхч, эрдэмтэд, олон улсын Монгол судлаачдын төлөөллийн саналыг сонсохоор энэхүү төлөвлөгөөт уулзалтыг БОАЖЯ-ын Хаан танхимд зохион байгуулжээ.

Уулзалтын үеэр төсөл хэрэгжих орон нутгийн Засаг дарга нар, орон нутгийн Байгаль орчин, аялал жуулчлалын газрын мэргэжилтнүүд, БОАЖ-ын сайдын дэргэдэх Аялал жуулчлалын мэргэжлийн зөвлөл, МҮХАҮТ-ын дэргэдэх Аялал жуулчлалын зөвлөл, БОАЖЯ-ны мэргэжилтэн, Түүхийн хүрээлэн, төслийн хороо зэрэг албаны төлөөлөл байлцав. Мөн Төрийн соёрхолт, МУГЗ, ШУ-ны доктор С.Дулам, Д.Төртогтох, зураач Б.Ганзориг, МУИС-ийн Археологи-антрологийн тэнхимийн дэд профессор Ц.Төрбат тэргүүтэй түүхч, эрдэмтдийн төлөөлөл оролцож, санал солилцоод хэрэгжих бүтээн байгуулалтын зураг төслийг дахин хэлэлцүүлэх санал дэвшүүлэв.

Тус уулзалтад оролцогчид Хөвсгөл нуурын болон Онон-Балжийн байгалийн цогцолборт газарт тогтвортой аялал жуулчлалыг хөгжүүлэх үндэсний загварыг бий болгох, төсөл хэрэгжиж буй орон нутгийн байгаль хамгаалал, аялал жуулчлал, эдийн засгийн асуудлыг цогцоор шийдвэрлэхэд олон нийтийн оролцоо, эрдэмтэн, судлаачдыг зайлшгүй байлцуулах шаардлагатайг дурдаж байв. Түүнчлэн дэд бүтцийн бүтээн байгуулалтыг эхнээс нь зөв зохион байгуулалттай хийж, үнэн түүхийн агуулга, илэрхийллийг шингээж, үеийн үед уламжлагдах бахархалт бүтээн байгуулалт болвол дэлхийд үнэ цэнэ бий болгож чадна гэдгийг тодотгож байлаа.

Тогтвортой аялал жуулчлалын төсөл дээр эрдэмтдийн саналыг сонслоо