БОАЖ-ын яамнаас Ойн судалгаа, хөгжлийн төвийн удирдлага, албан хаагчдын төлөөлөлтэй уулзаж тулгамдсан асуудлуудыг шийдвэрлэхийг үүрэг болголоо.

Ойн судалгаа, хөгжлийн төв нь өнөөдрийн байдлаар 12 үндсэн, 14 гэрээт ажилтантай. Сүүлийн хоёр сар цалингүй ажиллаж байна гээд бүтэц, орон тоо өнөөдрийг хүртэл ойлгомжгүй байгаа нь үйл ажиллагаагаа цаг хугацаандаа төлөвлөж явуулахаас эхлээд хүндрэл тулгарч байгаагаа илэрхийллээ.

Ойн салбарт тасралтгүй таваас дээш жил гэрээтээр ажиллаж буй мэргэжлийн боловсон хүчнээ үндсэн ажилтнаар авч ажиллуулах, нийт ажилтан албан хаагчдын нийгмийн асуудал орхигдож байгааг тус төвийнхөн хэллээ.  Тиймээс цаашид "Ойн агентлаг" байгуулах асуудлыг яаравчилж одоо ажиллаж байгаа бүх албан хаагчдыг үлдээн ажиллуулахыг БОАЖ-ын яамнаас үүрэг болголоо. Мөн Монгол орны ойн санг хортон шавьж, бусад хүчин зүйлээс хамгаалах ажлаа төлөвлөн эрчимжүүлэхгүй бол цаг хугацааны хувьд оройтож байгааг сануулаад, Ойн судалгаа, хөгжлийн төвийг анхааралдаа авч ажиллахыг хүслээ.

Ойн судалгаа, хөгжлийн төвийн харьяа Модлог ургамлын цэцэрлэгийн газар маргаантай хэвээр өнөөдрийг хүрч, мод, ургамлын төрөл зүйлийг авч үлдэх асуудал орхигдож байгаа тухай тус төвөөс онцлов. Тиймээс эрсдэлд ороод буй 1,1 тэрбум модыг хортон шавьжаас хамгаалах ажлыг зохион байгуулах төсөв, төслийг боловсруулж ойрын хугацаанд Монгол Улсын Ерөнхийлөгчийн Тамгын газар -т танилцуулахаар боллоо.