Өнөөдөр /2022.02.27/ МҮЭ-ийн холбооны Залуучуудын хороо, Эрдэнэт үйлдвэр ТӨҮГ-ын ҮЭ-ийн холбоо, Орхон аймгийн ҮЭ-ийн хамтран зохион байгуулж буй хойд бүсийн залуучуудын “Эв нэгдэл-Ирээдүй” чуулга уулзалт эхэллээ.

Тус чуулганд МҮЭ-ийн холбооны гишүүн байгууллага Орхон, Дархан-Уул, Булган, Сэлэнгэ, Хөвсгөл аймгийн ҮЭ-ийн холбоо, Эрдэнэт үйлдвэр ТӨҮГ-ын ҮЭ-ийн холбооны дэргэдэх Залуучуудын хорооны идэвхтэн сонгуультан 100 залуу хамрагдаж байна.

Энэхүү хоёр өдрийн турш үргэлжлэх чуулга уулзалтын зорилго нь хойд бүсийн ҮЭ-ийн залуу сонгуультнуудад МҮЭ-ийн холбооны XXIII Их хурлын шийдвэр, цаашдын зорилтыг танилцуулах, шинээр хэрэгжиж элээд буй Хөдөлмөрийн тухай хууль болон түүнийг даган гарч буй журам, аргачлалуудыг хэрэглэх чадавхыг дээшлүүлэх, ҮЭ-ийн хөдөлгөөнд залуучуудын оролцоог сайжруулахад оршиж буй юм.

Чуулга уулзалтын эхэнд МҮЭ-ийн холбооны Ерөнхийлөгч С.Эрдэнэтбат, Орхон аймгийн ҮЭ-ийн холбооны дарга М.Батцоож нар нээлтийн үг хэлж цар тахлын үед ҮЭ-ийн залуусын өмнө тулгамдаж байгаа бэрхшээлийг хэлэлцэж хойд бүсийн залуус чуулж буйд талархал илэрхийлэв. Энэ үеэр МҮЭ-ийн холбооны Ерөхийлөгч С.Эрдэнэбат “МҮЭ-ийн холбооны хөгжлийн хөтөлбөр-2030” танилцуулав.

Үргэлжлүүлэн “Хөдөлмөрийн тухай хуулийн шинэчлэл ба Зохистой хөдөлмөрийн үзэл баримтлал” сэдвээр МҮЭ-ийн холбооны Залуучуудын хорооны дарга, Монголын хөнгөн үйлдвэрийн ажилтны ҮЭ-ийн холбооны дарга Э.Тамир, “Эрдэнэт үйлдвэр ТӨҮГ-ын ҮЭ-ийн холбооны үйл ажиллагаа, Хамтын гэрээ байгуулах арга зүй” сэдвээр “Эрдэнэт үйлдвэр” ТӨҮГ-ын ҮЭ-ийн холбооны дарга Б.Төгсбаяр нар илтгэл мэдээлэл танилцууллаа.

МҮЭ-ийн холбооны “Эв нэгдэл-Ирээдүй” хойд бүсийн залуучуудын чуулга уулзалт эхэллээ