Монгол Улсын Ерөнхийлөгчийн зарлигаар төрийн дээд цол, одон медаль хүртсэн чөлөөт бөхийн бөхийн дэлхийн аварга шалгаруулах тэмцээний мөнгөн медальт, Монгол Улсын гавъяат тамирчин О.Бурмаа, Хөгжлийн бэрхшээлтэй хүмүүсийн 21 дүгээр олимпоос аваргын алтан медаль хүртсэн, гавъяат тамирчин Д.Очбадрал, улсын шигшээ багийн дасгалжуулагч, гавъяат дасгалжуулагч Т.Сүхбаатар нарын зэрэг тамирчдыг Эрүүл мэндийн сайд С.Ламбаа хүлээн авч уулзаж, баяр хүргэлээ. Энэ үеэр шинэхэн гавъяатуудаа ЭМЯ-ны Хүндэт дэвтэрт бичсэнийг баталгаажуулж батламж гардуулав.

Эрүүл мэндийн сайд С.Ламбаа хэлэхдээ “Амжилт гаргаж, аварга болно гэдэг нэг хэрэг. Харин үүнийг хадгална гэдэг хамгийн хэцүү. Монголын биеийн тамир спорт хөгжлийнхөө шинэ гараан дээр гарч ирлээ. 2012 оны олимпоос заавал алтан медаль авах үүргийг 2008 оны олимп бидэнд ногдуулсан. Иймд бүгд амжилтаа ахиулахын төлөө зүтгэцгээе” гэв.

Монголын Чөлөөт бөхийн холбооны удирдлага шинэчлэгдсэний дараа ийнхүү анхныхаа олон улсын тэмцээнээс медаль хүртсэн нь цаашид ихээхэн найдлага төрүүлж байгааг Эрүүл мэндийн сайд онцолж байв.