«Петровис» ХХК «Оргил Ойл» ХХК хамтран боловсруулан хэрэглээнд нэвтрүүлсэн «ЭКО-92» бензиний борлуулалтыг өчигдрөөс түр зогсоолоо. Харин энэ түр зогсолт хэдий хүртэл үргэлжлэх нь тодорхойгүй бөгөөд ямар ч байсан он гартал дээрх бензинийг борлуулахгүй юм байна.

АИ-92 бензин хэрэглэдэг бүх төрлийн автомашинд тохируулан үйлдвэрлэсэн, байгаль орчинд ээл­тэй, үндэсний үйлдвэрийн экологийн цэвэр этанол бүхий «ЭКО-92» бензин нь агаарт ялгаруулах хорт утааны хэмжээг 30-40 хувь бууруулдаг, автомашины хөдөлгүүрийн чадлыг нэмэгдүүлдэг зэрэг давуу талтай юм. Түүний дээр АИ-92 бензинээс 100 төгрөгөөр хямд үнэтэй борлуулагдаж байна. Энэ бензинийг өнгөрсөн сарын 9-ний өдрөөс эхлэн хэрэглээнд нэвтрүүлсэн. Нийслэлд дөрвөн шатахуун түгээх станцаар борлуулж байсан ч хэрэглэгчдэд таашаагдсан энэ бензиний эрэлт их байсан учир шатахуун түгээх станцад хэт их ачаалал үүсэх болжээ. Иймээс дээрх компаниуд хэрэглэгчдийнхээ санал хүсэлтээр «ЭКО-92» бензиний үйлдвэрлэлийн хүчин чадлыг нэмэгдүүлэх, өргөтгөх зорилгоор тус бензинийхээ борлуулалтыг түр хугацаагаар завсарлаж байгаа аж. Ингэснээр борлуулах ШТС-уудынхаа тоог нэмэгдүүлж, хэрэглэгчдэд илүү хүртээмжтэй түгээх боломжтой болох бөгөөд наад зах нь найман түгээх станцаар дамжуулан борлуулах зорилт тавьжээ.
Монгол Улсад анх удаа хэрэг­лэж байгаа «ЭКО-92» бензи­нийг нэвтрүүлэх нээлтэд Монгол Улсын Ерөнхийлөгч Ц.Элбэгдорж оролцож, дэлхийн цаг агаарын дулаарал, агаарын бохирдолд маш сайнаар нөлөөлөх бүтээгдэхүүнийг зах зээлд нэвтрүүлж байгаа компаниудад баяр хүргэж, энэ бүтээгдэхүүний цаашдын үйлдвэрлэлийг хөгжүүлэх үйлсэд тусламж дэмжлэг үзүүлэхээ илэрхийлэн анхны хэрэглэгч нь болж байсан юм.