Өнөөдөр (2022.03.18) МҮЭ-ийн Холбооны Ерөнхийлөгч С.Эрдэнэбат, Монголын Эрүүл Мэндийн Ажилтны Үйлдвэрчний Эвлэлийн Холбоо (МЭМАҮЭХ)-ны дарга Ч.Нарантуяа, МҮЭХ-ны хуульч М.Саранцацрал нар БЗД-гийн "Эрүүл мэндийн төв"-ийн ҮЭ-ийн хороонд ажиллаж байна.

Уулзалтад БЗД-гийн "Эрүүл мэндийн төв"-ийн дарга М.Болд, ҮЭ-ий хорооны дарга Я.Оюунчимэг, ҮЭ-ийн гишүүн тус эмнэлгийн эмч ажилтнууд оролцож байна.

Энэ үеэр МҮЭ-ийн холбооноос төрийн албан хаагчдын цалин хөлс, нийгмийн хамгаалал, тэтгэвэр, тэтгэмжийн чиглэлээр хийж хэрэгжүүлж байгаа ажил, Нийгмийн даатгалын багц хуулийн төсөл, Эрүүл мэндийн салбарын ажилтнуудын өмнө тулгамдаад буй гүйцэтгэлд суурилсан цалин хөлсний тогтолцоо зэрэг асуудлын хүрээнд танилцуулга хийв.

Мөн МЭМАҮЭХ-ны дарга Ч.Нарантуяа Эрүүл мэндийн салбарын ажилтнуудын цалин хөлсийг хоёр дахин нэмэгдүүлэх санал шаардлагыг хүргүүлж хийсэн тэмцлийн үеэр Монгол Улсын Ерөнхий Сайд Л.Оюун-Эрдэнэ цалин хөлс нэмэгдүүлэх талаар амлалт өгсөн боловч өнөөг хүртэл хэрэгжүүлээгүй. Иймд МЭМАҮЭХ-ноос УИХ, Засгийн газарт хүргүүлсэн удаа дараагийн шаардлагын хариуг нэхэж, эмч эмнэлгийн ажилтнуудын цалинг хоёр дахин нэмэгдүүлэх тэмцлийг хуулийн хүрээнд зохион байгуулж ажил хаях хүртэлх тэмцлийн арга хэмжээ авч ажиллахаа илэрхийллээ.

Харин "Эрүүл мэндийн төв"-ийн дарга М.Болд хэлэхдээ удирдлагуудын зүгээс өнгөрсөн 2021 оны 10-12 дүгаар саруудад ажилтнуудын урамшууллыг тус бүр 10-30 хувь, нийт 110 хувь нэмэгдүүлж ажилласан. Байгууллагын үйл ажиллагааг явуулах, ажилтнуудын цалин хөлсийг нэмэгдүүлэхэд гүйцэтгэлд суурилсан цалин хөлсний тогтолцоо,  бэрхшээл дагуулж байгаа тухай онцлон хэлсэн юм.

Үргэлжлүүлэн МҮЭ-ийн холбооны хуульч М.Саранцацрал "Хөдөлмөрийн тухай хуулийн шинэчилсэн найруулга" танилцуулга сургалт хийлээ.