Манай улсад өнөөдрийн байдлаар 107 орны 34 мянга гаруй гадаадын иргэн ажиллаж амьдарч байна.


Гадаадын иргэн харьяатын асуудал эрхлэх газрын мэдээлснээр оны эхний есөн сард нийт 19 орны 2367 иргэнийг албадан гаргажээ. Харин өнгөрсөн сард гадаадын 23 орны 327 иргэнд захиргааны арга хэмжээ авсан нь өмнөх оны мөн үеэс 34.8 хувиар буурч, 60 сая 250 мянган төгрөгийн мөнгөн торгууль ногдуулсан байна.

Дээрх гадаадын иргэд нь Монгол Улсад оршин суух, дамжин өнгөрөх, бүртгэл, хөдөлмөр эрхлэх журам зөрчсөн болон визийн хугацаа хэтрүүлсэн зэрэг зөрчил гаргажээ. Зөрчлийн дийлэнх нь буюу 36 хувь нь визийн хугацаа хэтрүүлсэн байна. Гадаад улсаас урьсан иргэнээ хугацаанд нь бүртгүүлээгүй, хууль бус хөдөлмөр эрхлүүлсэн, визийн хугацаа хэтрүүлсэн, нуун далдалсан зэрэг зөрчлийн улмаас 51 аж ахуйн нэгж, байгууллагад 61 сая 250 мянган төгрөгийн мөнгөн торгууль ногдуулж, нийт дүнгээр 38 сая 300 мянган төгрөгийг улсын төсөвт оруулжээ. Энэчлэн барилгын салбарт үйл ажиллагаа явуулж буй аж ахуйн нэгжид хөдөлмөр эрхэлж байгаа гадаадын иргэдийн бичиг баримтыг шалгасан аж. Нийслэлийн Баянгол, Баянзүрх, Хан-Уул, Чингэлтэй, Сүхбаатар дүүргийн нутагт үйл ажиллагаа явуулдаг 22 аж ахуйн нэгж, байгууллагад ажилладаг гадаадын 539 иргэний бичиг баримтыг эл шалгалтаар нягталжээ.

Энэ үеэр зөрчилтэй 81 иргэнийг илрүүлэн Захиргааны хариуцлагын тухай хуулийн дагуу арга хэмжээ авч, гарах виз олгон, заримыг нь албадан гаргасан байна. Мөн Монгол Улсад оршин суух хугацаа хэтрүүлэн, эрх бүхий байгууллагын зөвшөөрөлгүй хөдөлмөр эрхэлж байсан нь тогтоогдсон таван орны 463 иргэнийг албадан гаргаж, Монгол Улсад орохыг хориглосон дардас даржээ. Харин ГИХАЭГ-ын хилийн боомтын албадын хувьд Алтанбулаг, Бичигт, Буянт-Ухаа, Замын-Үүд, Сүхбаатар, Хавирга, Шивээхүрэн боомтуудад Монгол Улсад орох зорилгоо тодорхойлж чадаагүй, хууль бусаар хөдөлмөр эрхлэх зорилготой ирсэн есөн орны 65 иргэнийг хилээр оруулалгүй, зургаан орны 14 иргэнийг хилээр гаргалгүй буцаасан байна. Хилийн боомт, орон нутагт гадаадын 97384 иргэний бичиг баримтад үзлэг хийж, Монгол Улсад оршин суух, дамжин өнгөрөх, бүртгэл, хөдөлмөр эрхлэх журам зөрчсөн болон визийн хугацаа хэтрүүлсэн 21 орны 174 иргэнд арга хэмжээ аван, 27 сая 950 мянган төгрөгийн торгууль ногдуулжээ.

Үүний зэрэгцээ хилийн боомтод ажиллаж байгаа албад гадаад улсаас урьсан иргэнээ зохих хугацаанд бүртгүүлээгүй, хууль бус хөдөлмөр эрхлүүлсэн, визийн хугацаа хэтрүүлсэн, нуун далдалсан зэрэг зөрчлийн улмаас гадаадын 501 иргэн, 51 аж ахуйн нэгж, байгууллагад 149 сая 450 мянган төгрөгийн торгууль ногдуулж, улсын төсөвт оруулжээ.