УИХ-ын чуулганы өнөөдрийн \2022.06.10\ нэгдсэн хуралдаанаар УИХ-ын гишүүн Ж.Чинбүрэнгээс Монгол Улсын Ерөнхий сайд Л.Оюун-Эрдэнэд хандаж “Элэг бүтэн Монгол” Үндэсний хөтөлбөрийн хэрэгжилтийн талаар тавьсан асуулгын хариуг сонсож байна.

УИХ-ын гишүүн Б.Баярсайхан: 

Өнөөдөр Монгол улс элэгний хорт хавдрын тоогоор дэлхийд нэгдүгээр байранд, ходоодны хорт хавдрын өвчлөлөөр хоёрт эрэмбэлэгдэж буй муу статистиктай байна. Монгол улсад насанд хүрсэн 2 хүн тутмын нэг нь, 3 хүүхэд тутмын нэг нь таргалалттай байна. Эрүүл мэндийн яамны мэдээллээр хорт хавдар үүсэх 3 хүчин зүйлийн нэг нь буруу хооллолт, хөдөлгөөний хомсдол гэж хэлсэн. Засгийн газрын үйл ажиллагааны хөтөлбөрт 2.1.1 дээр иргэдийн эрүүл мэндийн боловсролыг дээшлүүлж, иргэн бүр урьдчилан сэргийлэх, эрт илрүүлэг үзлэг оношилгоонд хамрагдаж, эрүүл идэвхитэй амьдралын хэв маягийг төлөвшүүлэх арга хэмжээнүүдийг үндэсний хэмжээнд хэрэгжүүлнэ гэж зорьсон. 2021-2025 онд Монгол улсыг хөгжүүлэх үндсэн чиглэл дээр халдварт болон халдварт бус өвчнөөс сэргийлэх, хянах, илрүүлэх тогтолцоог үндэсний түвшинд шинэчилж, нийгмийн эрүүл мэндийг онцгой анхаарна гэсэн зорилтуудыг тавиад Эрүүл мэндийн сайдын өнгөрөгч 2 оны хэрэгжилтийн үр дүнг 100 хувь гэж үнэлсэн байна.

Нийт зарцуулсан мөнгийг харахаар жилд 18 тэрбум, 600 сая төгрөг. Үүнээс 7,3 сая төгрөг нь Азийн хөгжлийн банкны “Эрүүл мэндийн салбарын хөгжил хөтөлбөр 5” төслөөс 6,7 сая төгрөг нь улсын төсвөөс, 4,8 сая нь эрүүл мэндийн салбарын хөгжил хөтөлбөрөөс гэж явдаг юм байна. Тэгэхээр энэ салбар, салбарын сайдын орон нутагт хийх ажил Завхан аймагт хэр байгаа вэ? Энэ мөнгөнөөс хэдэн төгрөг нь Завхан аймагт хуваарилагдсан бөгөөд өнгөрсөн хоёр жилд нийгмийн эрүүл мэндийг сайжруулахад яг юу хийсэн бэ?

 Түүний асуултад Эрүүл мэндийн сайд С.Энхболд хариуллаа.