Баянзүрх дүүргийн Ардчилсан намын дарга Тогтохын Мөнхбаяр нь дур зоргоор аашлан намын дүрэм зөрчиж, хүний эрх, эрх чөлөөнд халдсан үйлдлийг удаа дараа гаргаж буйд дургүйцсэн гишүүдийг төлөөлөн дүүргийн Ардчилсан намын 12 дугаар үүрийн дарга У.Цэцэгмаа, долдугаар үүрийн дарга Ч.Дүүриймаа, намын гишүүн Х.Цэдэнбал, Д.Бат, намын эмэгтэйчүүдийн зөвлөлийн дарга Д.Нарангоо нар өнөөдөр мэдээлэл хийлээ.

Т.Мөнхбаяр гэгч БЗД-ийн Ардчилсан намын хорооны даргын суудалд суусан 1992 оноос хойш өдий хүртэл хугацаанд сууж байгаа нь намын дүрэмд заасан дөрвөн жилд нэг удаа намын хороо хуралдан даргаа сонгодог зарчим алдагдсан талаар дүүргийн намын гишүүд ярьж байна. Сүүлийн гурван удаагийн орон нутгийн сонгуульд дүүргийн хэмжээнд байнга ялагдал хүлээн, нийслэл дүүргийн ИТХ-д төлөөлөлтэй болж чадахгүй байгаа нь ч энэ хүнд ажлын хариуцлага тооцох цаг болсныг харуулж байна гэж тэд үзэж байгаа аж. Мөн өөрийг нь шүүмжилсэн, итгэл үзүүлэх, эсэх гэсэн асуудлыг хөндсөн гишүүдийг “гишүүний татвараа төлөөгүй” гэсэн үндэслэлээр 2009 оны 8 дугаар сард 20 гишүүнийг, 10 дугаар сард 16 гишүүнийг намаас хөөжээ . Тэд Ардчилсан намын дотоод сонгуулийн хороо, Нийслэлийн намын дарга С.Эрдэнэ, Ардчилсан намын дарга Н.Алтанхуяг нарт “БЗД-ийн Ардчилсан намын хорооны ээлжит хурлыг төв намаас ажлын хэсэг байгуулан ирэх сарын 8-ны дотор хуралдуулах, дүрмийн бус шалтгаанаар хассан намын гишүүдийн эрхийг сэргээх” гэсэн үндсэн хоёр шаардлагыг удаа дараа хүргүүлээд байгаа боловч одоог хүртэл тодорхой хариу өгөөгүй байгаа аж.

Тиймээс өөрсдийнх нь шаардлагыг эс зөвшөөрсөн тохиолдолд хууль хяналтын байгууллагаар шалгуулж, жагсаал цуглаан зохион байгуулна гэдгээ тус дүүргийн Ардчилсан намын гишүүд мэдэгдлээ.