Баянхонгороос сонгогдсон гишүүд шууд ярилцлага хийлээ
УИХ-ын Тамгын газраас эрхлэн хөдөө, орон нутагт үйл ажиллагаа явуулж буй УИХ-ыг сурталчлах төвүүдийг түшиглэн Онлайн шууд ярилцлагыг энэ жилээс эхлэн хийдэг болсоор нэлээд хугацаа өнгөрөөд байна
.
Мэдээллийн технологийн давуу талыг ашиглан Төрийн ордноос тухайн аймгуудтай шууд холбогддог Онлайн ярилцлага нь УИХ-ын үйл ажиллагааг иргэд, сонгогчдод сурталчлах, УИХ-аар хуулийн төсөл хэлэлцэх явцад иргэд, олон нийтийн оролцоог нэмэгдүүлэх, тэдэнд хууль тогтоох үйл явцыг илүү нээлттэй, ил тод болгоход багагүй ач холбогдолтой юм.
Түүнчлэн сонгогчид өөрсдийн сонгосон гишүүдтэйгээ шууд холбогдон, сонирхсон асуултдаа хариулт авах, УИХ-ын гишүүд иргэд, сонгогчдын төлөөлөлтэйгээ онлайнаар нүүр тулан уулзаж, санал бодлоо солилцох өргөн боломж бүрдлээ.
УИХ-ын хууль тогтоох болон хянан шалгах ажиллагаанд иргэд, төрийн бус байгууллагуудын оролцоог нэмэгдүүлэхэд энэхүү шууд ярилцлага зохих үр нөлөө үзүүлж байна. Энэ талаар УИХ-ын Стратеги төлөвлөгөөнд заасан зорилт ч байгаа.
Шууд ярилцлага хийдэг болсноор нэг талаас УИХ-аас батлагдан гарсан хууль, тогтоол шийдвэрийг иргэдэд хүргэх, нөгөө талаас УИХ-ын чуулганаар хэлэлцэх хууль, шийдвэрийн төслийн талаарх иргэдийн санал хүсэлтийг авах, тухайн орон нутгаас сонгогдсон УИХ-ын гишүүний үйл ажиллагааг сурталчлах, мэдээллийн эргэх холбоо үүсгэхэд чухал ач холбогдолтой байгаа билээ хэмээн УИХ-ын Хэвлэл мэдээлэл, сурталчилгааны хэлтсийн дарга Б.Золбаяр өнөөдрийн Онлайн ярилцлагын үеэр мэдэгдлээ.
Өнөөдрийн долоо дахь удаагийн ярилцлагад Баянхонгор аймгаас сонгогдсон УИХ-ын гишүүн Б.Батбаяр, Х.Баттулга, Г.Занданшатар нар оролцсон юм.
УИХ-ын гишүүд “Бичил уурхайн эрх зүйн орчныг бүрдүүлэх” талаар ярилцаж, иргэдийн сонирхсон асуултад хариуллаа. Түүнчлэн Баянхонгор аймгийн 2010 оны төсөв, үндсэн чиглэлийн талаар аймаг, орон нутгийн холбогдох албаны хүмүүстэй санал солилцож, тэдний асуултад хариулсан.
Төрийн ордноос шууд дамжуулан Баянхонгор аймагтай холбогдсон энэхүү Онлайн ярилцлагад тус аймгийн ИТХ-ын дарга Г.Батжаргал, Засаг даргын Тамгын газрын дарга Ч.Гомбодорж нарын хариуцлагатай ажилтнууд, иргэд, сонгогчдын төлөөлөл оролцов хэмээн УИХ-ын Хэвлэл мэдээлэл, сурталчилгааны хэлтэс мэдээлэв.
