УИХ-ын чуулганы 11 дүгээр сарын 04-ний өдрийн үдээс хойшхи нэгдсэн хуралдаанаар Монгол Улсын эдийн засаг, нийгмийг 2010 онд хөгжүүлэх үндсэн чиглэл батлах тухай УИХ-ын тогтоолын төслийн анхны хэлэлцүүлгийг хийлээ.


Хуралдааны эхэнд үндсэн чиглэлийн төслийг Байнгын хороод болон УИХ дахь намуудын бүлгүүд тусгайлан хэлэлцэн гаргасан санал дүгнэлтээ танилцуулсан бөгөөд уг төслийн талаар нийтдээ 240 орчим зарчмын болон найруулгын чанартай саналын томъёоллуудыг гаргасан байна. УИХ дахь намуудын бүлэг, Байнгын хороодоос гаргасан санал дүгнэлт, зарчмын зөрүүтэй саналын томъёоллуудыг Эдийн засгийн байнгын хороо нэг бүрчлэн хэлэлцэж, санал хураалт явуулсан бөгөөд нэгдсэн хуралдаанаар эдгээр саналын томъёоллуудаар санал хураалаа.

МАХН-ын бүлгээс гаргасан “Атрын 3 дахь аян”-ыг эрчимжүүлэх ажлын хүрээнд гол мөрөн бусад эх үүсвэрээр усан сан байгуулж, усалгаатай газар тариалан хөгжүүлэх санаачлагыг дэмжих, жилдээ 2 сая тонн түүхий тос боловсруулах хүчин чадал бүхий Газрын тос боловсруулах үйлдвэрийг бэлэн болсон ТЭЗҮ-ийн үндсэн дээр Дархан-Уул аймагт барих техникийн зураг төслийг дуусгаж, уг төслийг хэрэгжүүлж эхлэх, стратегийн болон томоохон орд газраас олсон орлогоос иргэн бүрт 1,5 сая төгрөг хүртээх эрхзүйн орчныг бүрдүүлж, үе шаттай хэрэгжүүлж эхлэх, оюутны дотуур байрны хүрэлцээг сайжруулах, “Оюутны дотуур байр-20000” хөтөлбөр боловсруулан хэрэгжүүлж эхлэх, төвөөс алслагдсан болон говийн бүсийн иргэдэд бүсийн нэмэгдэл олгох эрхзүйн орчин бүрдүүлэх гэсэн арга хэмжээг үндсэн чиглэлийн төсөлд нэмэх саналууд олонхийн дэмжлэг авсан. Харин их дээд сургуулиудын өрсөлдөх чадварыг дээшлүүлж, өмчийн хэлбэр харгалзахгүйгээр төрөөс дэмжих арга хэмжээг хэрэгжүүлэх гэсэн санал олонхийн дэмжлэг аваагүй.

Р.Гончигдорж нарын гишүүд, зах зээлд борлогдохгүй байгаа боловсон хүчин бэлтгэж буй сургуулиудаас эхлээд салах хэрэгтэй. Чадалтай, мэдлэгтэй боловсон хүчин бэлтгэдэг зөв бүтэцтэй болсны дараа төрөөс дэмжин, байр суурийг нь бэхжүүлэн томсгох арга хэмжээ авах нь зүйтэй гэсэн байр суурьтай байсан. Өнөөдөр хичээлийн байргүй шахам, хөдөлмөрийн зах зээл дээр борлогдохгүй боловсон хүчин бэлтгэж буй 200 шахам сургуулийн асуудлыг нэг мөр цэгцлэх хэрэгтэй гэж Р.Гончигдорж гишүүн хэлсэн. Тиймээс төрийн, хувийн гэж ялгахгүйгээр төрөөс дэмжих арга хэмжээ авах санал дэмжигдсэнгүй.

Түүнчлэн нийслэл хотод 4 дүгээр төрөх эмнэлгийг барих, гэр хорооллын иргэдэд төрийн үйлчилгээг ойртуулах зорилгоор хороо, цагдаа, өрхийн эмнэлгийн цогцолборыг 20 хороонд барих, гэр хорооллыг орон сууцжуулах, газраа байраар солих эрхзүйн орчин бий болгох саналуудыг гишүүд дуу нэгтэй дэмжсэн.

Ардчилсан намын бүлгээс гаргасан алтны нөөцийг өсгөх, орчин үеийн шилдэг техник, технологи, нэвтрүүлэх замаар үйлдвэрлэлийг нэмэгдүүлэх арга хэмжээ авч, алт цэвэршүүлэх үндэсний үйлдвэр байгуулах үйл ажиллагааг дэмжих, мэргэжлийн сургалт үйлдвэрлэлийн төвд суралцагчдын тоог нэмэгдүүлэх, аж ахуйн нэгж, үйлдвэрийн газрыг түшиглэсэн түргэвчилсэн сургалтаар мэргэжил олгох тогтолцоог урамшуулан дэмжиж, мэргэжлийн зөрүүгээс ажилгүйдэл үүсэх шалтгааныг бууруулах, гадаадаас авч байгаа ажилчидтай ижил мэргэжлийн ажилчдыг дотооддоо бэлтгэх, зам, барилга, уул уурхай, үйлдвэр барих зэрэг хөрөнгө оруулалт, бүтээн байгуулалтын төслүүд дээр монгол ажилчдыг ажиллуулах зорилгоор мэргэжлийн сургалт, үйлдвэрлэлийн төвд хурдавчилсан сургалтаар мэргэжил дээшлүүлэх ажлыг зохион байгуулах, хүрээлэн буй орчны бохирдол, байгалийн болон хүний үйл ажиллагаанаас үүдэн гарах гамшиг, нийтийг хамарсан өвчлөл, хордлого, гэнэтийн аюул ослын үед үзүүлэх эмнэлгийн тусламж, үйлчилгээг боловсронгуй болгож, авах арга хэмжээг шуурхай зохион байгуулах нөөц чадавхийг бэхжүүлэх зэрэг саналууд гишүүдийн олонхийн дэмжлэгийг авсан.

Ийнхүү нэгдсэн хуралдаанаар 240 гаруй саналын томъёоллыг хэлэлцэн санал хураалт явуулж хоёрдугаар хэлэлцүүлэгт бэлтгүүлэхээр Эдийн засгийн байнгын хороонд шилжүүллээ.