Хүний хөгжил сангийн тухай хууль батлагдсантай холбогдуулан УИХ дахь Ардчилсан намын бүлгээс уг хуулийн амин сүнс болсон “Баянмонгол корпораци “ байгуулах санааг анх гаргаж Эрдэнийн хувь-Баянмонгол хуулийн төслийг санаачилсан УИХ-ын гишүүн Л.Болдод талархал илэрхийлж өргөмжлөл гардуулжээ. Уг өргөмжлөлд “Ардчилсан Намын үзэл баримтлал, УИХ-ын 2008 оны сонгуулийн мөрийн хөтөлбөрт тусгасан зорилтуудыг хууль, УИХ-ын бусад шийдвэрт тусгаж Монгол Улсын иргэн бүр эх орныхоо байгалийн баялгаас хувь хүртэх боломжийг олгосон. Хүний хөгжил сангийн тухай хуулийн төслийг санаачлахад өөрийн хүч, авьяасаа дайчлан ажилласанд нь талархал илэрхийлж байна. “Монгол Улс түүхэндээ анх удаа байгалийн баялгаа хувьцаа хэлбэрээр нийт иргэндээ тэгш хуваарилах эрх зүйн шинэ орчин бүрдсэн төдийгүй, Монгол Улсын уул уурхайн хөгжил, шинэчлэлд томоохон хувь нэмэр оруулсан түүхэн үйл хэрэг болсныг тэмдэглэж чинхүү сэтгэл зүтгэлээ төрийн үйл хэрэгт зориулсан Танд гүн талархал илэрхийлье” гэжээ.