УИХ-ын Нийгмийн бодлого, боловсрол, соёл, шинжлэх ухааны байнгын хороо өнөөдөр үдээс өмнө хуралдаж Хүний хөгжил сангийн 2010 оны төсвийн тухай хуулийн төслийн хоёр дахь хэлэлцүүлэг, Эм, эмнэлгийн хэрэгслийн тухай хуульд нэмэлт оруулах тухай хуулийн төслийн анхны хэлэлцүүлгийг тус тус хийлээ.

Хүний хөгжил сангийн тухай хууль батлагдсантай холбогдуулан нийт хүн амд олгодог нийгмийн халамжийг сайжруулж зорилтод бүлэг рүү чиглүүлэх, Монгол Улсыг хөгжүүлэх сангаас олгож байсан хүүхдийн болон шинээр төрсөн хүүхэд, шинэ гэр бүлд олгодог нийгмийн халамжийн тэтгэмжийг Хүний хөгжил сангаас олгох асуудал гишүүдийн дэмжлэг авав.

Мөн Хүний хөгжил сангийн 2010 оны төсвийн тухай хуулийн төслийг дагалдан өргөн мэдүүлсэн “Иргэний эрүүл мэндийн даатгалын тухай хуульд өөрчлөлт оруулах тухай”, Монгол улсыг хөгжүүлэн сангийн тухай хуулийг хүчингүй болсонд тооцох тухай, Эх хүүхдэд тэтгэмж олгох, хүүхэд, эх, гэр бүлд мөнгөн тусламж үзүүлэх тухай хуулийг хүчингүй болсонд тооцох тухай, Засгийн газрын тусгай сангийн тухай хуульд өөрчлөлт оруулах тухай, Монгол Улсын нэгдсэн төсвийн тухай хуульд өөрчлөлт оруулах тухай, Нийгмийн халамжийн тухай хуульд нэмэлт оруулах тухай хуулиудын төсөл, Тогтоол хүчингүй болсонд тооцох тухай, Тогтоолд өөрчлөлт оруулах тухай УИХ-ын тогтоолын төслүүдийг хэлэлцэх эсэх асуудлыг хэлэлцэж хуулийн төслүүдийг чуулганы хуралданаар хэлэлцүүлэх нь зүйтэй гэж гишүүд үзлээ.

Эм, эмнэлгийн хэрэгслийн тухай хуульд нэмэлт оруулах тухай хуулийн төслийн анхны хэлэлцүүлгийг хэлэлцэх явцад Д.Очирбат гишүүн уламжлалт анагаах ухаанд хэрэглэж байгаа эмийн талаарх зохицуулалт хуулинд байдаггүй тул энэ чиглэлийг нэмж тусгах шаардлагатай гэсэн байр суурьтай байсан бол гишүүн С.Эрдэнэ эмийн улсын бүртгэлд бүртгэгдээгүй боловч Дэлхийн эрүүл мэндийн байгууллагаас хүлээн зөвшөөрсөн эмийн жагсаалт, лавлагаанд орсон эмийг импортлох хэрэгтэй гэсэн саналыг гаргалаа.

Уг хуулийн төслийг анхны хэлэлцүүлгээр нь батлах горимын санал гарсныг Байнгын хорооны хуралдаанд оролцсон гишүүд дэмжив .