Та бүхэнд Монгол Улсад анхдугаар Үндсэн хууль батлагдсаны 85 жилийн ойн түүхэн өдрийн мэндчилгээ дэвшүүлье!


Монголчууд түүхэндээ дэлхийн гүрнийг байгуулж чадсан, сэргэж мандаж явсан, бас сорилт бэрхшээлийг даван туулж ирсэн аугаа ард түмэн. Анхны Үндсэн хууль бол монгол түүхийн салшгүй нэгэн хэсэг юм.

Өвөг дээдсийн минь бидэнд өвлүүлж өгсөн газар шороо, тусгаар тогтнол, бүрэн эрхт байдал, эрх, эрх чөлөөг бид үеийн үед нандигнан явах учиртай. Монгол түмэн эв нэгдэлтэй, хамтын зорилго, үнэт зүйлтэй, өөдрөг тэмүүлэлтэй, шаргуу хөдөлмөрч байсан цагт эх түүхээ улам нэр хүндтэйгээр залуурдан бүтээх хувь тавилантай улс.

Өнөөдөр энэхүү түүхэн өдрөөр, эх орныхоо өнцөг булан бүрт салбартаа он удаан жил ажиллаж нэр төртэй гавъяа байгуулсан хүмүүсийн, хөдөлмөр зүтгэлийг Монголын төр үнэлж байна.

Газар тариалан, мал аж ахуй, боловсрол, эрүүл мэнд, хууль эрх зүй, батлан хамгаалах, уул уурхай, эрчим хүч, статистик зэрэг эх ороныхоо хөгжил дэвшлийн олон салбарт хөдөлмөр зүтгэлээ зориулж ирсэн Та бүхэнд баяр хүргэж, талархал илэрхийлье. 

Ялангуяа, ариун шимт газрынхаа халиурсан тариан дундаас, буянт мал сүргийнхээ төлийн дуу цангинах хотноос Монгол Улсын Хөдөлмөрийн баатар болж буй Ш.Мардаан гуай, П.Галсан-Ёндон гуай нарт халуун баяр хүргэе.

Та бүхний цаашдын ажил хөдөлмөрт өндөр амжилт хүсэн ерөөе!