Байгаль орчин, аялал жуулчлалын яамны долоо хоногт хийж хэрэгжүүлсэн ажлуудаас товч танилцуулж байна. Үүнд:

ГОРХИ-ТЭРЭЛЖИД 30 ГА ГАЗРЫГ МОД ТАРИХАД ЗОРИУЛАН ГАРГАЛАА
Горхи-Тэрэлжид 30 га газрыг мод тарихад зориулан гаргаж, байгаль орчин, аялал жуулчлалын яамны 117 дугаарын утсаар мод тарих сонирхолтой аж ахуй нэгж байгууллагыг бүртгэж эхэллээ.

НҮХЭН ЖОРЛОНГ БУУЛГАЖ ЭХЭЛЛЭЭ
Байгаль орчин, аялал жуулчлалын сайдын албан даалгаварын хүрээнд ой, усан сан бүхий газарт байрлах нүхэн жорлонг буулгуулж эхэллээ.

УУР АМЬСГАЛЫН ӨӨРЧЛӨЛТИЙН ЭСРЭГ БҮС НУТГИЙН ХЭМЖЭЭНД ХАМТРАН АЖИЛЛАХАД МОНГОЛ УЛСАД ДЭМЖЛЭГ ҮЗҮҮЛНЭ
Байгаль орчин, аялал жуулчлалын сайд Б.Бат-Эрдэнэ НҮБ-ын Ази, номхон далайн нийгэм, эдийн засгийн комиссын гүйцэтгэх дэд захирал Кавех Захеди болон НҮБ-ын Ази, номхон далайн нийгэм, эдийн засгийн комиссын Зүүн хойд азийн бүсийн дарга Б.Ганболд нарын албаны төлөөллийг хүлээн авч уулзлаа.

“ТОГТВОРТОЙ ХӨГЖЛИЙН ЗОРИЛГО” НЭЭЛТТЭЙ ӨДӨРЛӨГ СҮХБААТАРЫН ТАЛБАЙД БОЛЛОО
Монгол Улсын Засгийн газар, Нэгдсэн үндэстний байгууллага, Монголын үндэсний худалдаа, аж үйлдвэрийн танхим болон Нийслэлийн Засаг даргын тамгын газар хамтран “Тогтвортой хөгжлийн зорилго” нээлттэй өдөрлөгийг 2022 оны 09 дүгээр сарын 10-ны өдөр Сүхбаатарын талбайд зохион байгуулагдлаа.

БИДНИЙ АМЬСГАЛЖ БУЙ АГААР НЭГ ЮМ - INTERNATIONAL DAY OF CLEAN AIR FOR BLUE SKY
Монгол Улсын Засгийн газар, НҮБ-ын Хүүхдийн сан, Швейцарын хөгжлийн агентлагийн дэмжлэгтэйгээр хэрэгжүүлж буй “Эх, хүүхдийн эрүүл мэндэд агаарын бохирдлын үзүүлэх нөлөөг бууруулах нь” төслийн хүрээнд хэрэгжүүлж буй ЧИП/CHIP төслийг танилцуулав.

"МОНГОЛ ОРНОО ХОГНООС САЛГАЯ" АЯН ОРОН ДАЯАР ХЭРЭГЖИЖ БАЙНА
Энэхүү аянд Байгаль орчин, аялал жуулчлалын яам, түүний харьяа сав газар болон хамгаалалтын захиргаадын албан хаагч, нутгийн иргэд идэвхтэй оролцон нэгдэж, усны сан бүхий газрыг бохирдож, хомстохоос урьдчилан сэргийлэх зорилгоор усан сан бүхий газар, түүний хамгаалалтын бүс, ойр орчмын газрын хог хаягдлыг цэвэрлэх чиглэлээр хамтран ажиллаж байна.

БАЙГАЛЬ ОРЧИН, АЯЛАЛ ЖУУЛЧЛАЛЫН ЯАМНЫ ХҮРЭЭЛЭН БУЙ ОРЧНЫ ГАЗРЫН ДАРГА А.ЭНХБАТ ИРГЭД, ОЛОН НИЙТЭД МЭДЭЭЛЭЛ ХҮРГЭН АЖИЛЛАВ
Төрийн үйлчилгээг иргэдэд аливаа хүнд сурталгүй, түргэн шуурхай хүргэх зорилгоор иргэдтэй биечлэн уулзаж, асуудлыг нь газар дээр нь шийдвэрлэх чиглэлээр БОАЖЯ-ны газар хэлтсийн дарга нарыг яамны "Нэг цэг"-т биечлэн ажиллахыг Байгаль орчин, аялал жуулчлалын сайд Б.Бат-Эрдэнэ үүрэг болгосон. Энэ ажлын хүрээнд БОАЖЯ-ны газар хэлтсийн дарга, удирдлагууд тодорхой хуваарийн дагуу энэ 7 хоногоос эхлэн “Нэг Цэг”-т биечлэн ажиллаж, иргэд олон нийттэй уулзаж, нээлттэй мэдээлэл өгч ажиллаж байна.

БАЙГАЛЬ ОРЧИН, АЯЛАЛ ЖУУЛЧЛАЛЫН ЯАМНЫ “НЭГ ЦЭГ”-ЭЭС ӨДӨРТ 200 ГАРУЙ ХҮН ҮЙЛЧИЛГЭЭ АВДАГ
БОАЖЯ-ны “Нэг цэг”-т өдөрт дунджаар 120, давхардсан тоогоор 200 гаруй хүн үйлчилгээ авахаар ханддаг. Иргэд, аж ахуй нэгж байгууллагаас ирүүлсэн албан хүсэлтүүдийг холбогдох газарт нь шилжүүлэн шийдвэрлэх, яамнаас олгогдож буй 22 төрлийн зөвшөөрлийг албажуулан олгох, тайлан, дүгнэлт албан бичгийн хариуг өгөх, иргэдийн санал хүсэлтийг хүлээн авах гээд төрийн үйлчилгээг иргэдэд хүнд сурталгүй, түргэн шуурхай хүргэхэд илүү анхаарч ажиллаж байна.

БОАЖ-ЫН ДЭД САЙД Г.ТҮВДЭНДОРЖ БНСУ-Д АЖИЛЛАВ
БОАЖ-ын Дэд сайд Г.Түвдэндорж Бүгд Найрамдах Солонгос Улсын Сувон хотын дарга И Жэ Жүн, “Ногоон Ази Сүлжээ” ОУТББ-ын дарга У Ги Чүл нартай уулзав.

БАЙГАЛЬ ОРЧИН, АЯЛАЛ ЖУУЛЧЛАЛЫН САЙД Б.БАТ-ЭРДЭНЭ НҮБ-ЫН ХҮҮХДИЙН САНГИЙН МОНГОЛ ДАХЬ СУУРИН ТӨЛӨӨЛӨГЧ ЭВАРИСТЕ КОУАССИ-КОМЛА ТЭРГҮҮТЭЙ АЛБАНЫ ТӨЛӨӨЛЛИЙГ ХҮЛЭЭН АВЧ УУЛЗЛАА
Уулзалтаар талууд дотоод, гадаад агаарын чанар, түүний хяналтын систем болон Монгол гэрийн дулаалга-Чип төсөл, хүүхэд ба эрүүл мэнд, байгаль орчны зорилтод хөтөлбөрт хүүхэд залуучуудын оролцоог нэмэгдүүлэх, хамтын ажиллагааг өргөжүүлэн тэлэх зэрэг өргөн сэдвээр ярилцаж, санал солилцлоо.

АЗИ, НОМХОН ДАЛАЙН ЦЭВЭР АГААРЫН ТҮНШЛЭЛИЙН 4 ДҮГЭЭР ХАМТАРСАН ФОРУМ (APCAP 4) БНСУ-Д БОЛЛОО
Байгаль орчин, аялал жуулчлалын дэд сайд Г.Түвдэндорж Ази, Номхон далайн цэвэр агаарын түншлэлийн 4 дүгээр хамтарсан форум (APCAP 4)-ын хүрээнд “Ази, Номхон далайн бүс нутгийн цэвэр агаарын төлөөх хөрөнгө оруулалт” сэдэвт хэлэлцүүлэгт панелистаар оролцов.

УСНЫ НӨӨЦИЙН МОНИТОРИНГ ХЭРЭГЖҮҮЛДЭГ УСНЫ ХАРУУЛЫН АЖИГЛАГЧ НАРЫГ АМЬ НАС, ЭРҮҮЛ МЭНДИЙН ДААТГАЛД ХАМРУУЛЛАА
Гол мөрөн, нуур, мөстөл мөсөн голын усны нөөцийн өдөр бүрийн хяналтыг хийдэг, голын урсцыг хэмжих зорилгоор жилд дунджаар 60 орчим удаа зундаа гол усанд, өвөлдөө мөсөнд орж ажилладаг юм.
Мөн мөстлийн хяналтыг хийхээр Алтай таван богдын Хүйтний оргил зэрэг өндөр ууланд хэдэнтээ гарч, салбарыг чухал ач холбогдолтой мэдээллээр ханган ажилладаг гол нуур, мөстөл мөсөн голын харуулын ажиглагчид, төрийн үйлчилгээний 200 гаруй ажилчдыг амь нас, эрүүл мэндийн гэнэтийн ослын даатгалд хамрууллаа.

БАЯН-ӨЛГИЙН АЙМГИЙН ДӨРВӨН СУМЫН БАЙГАЛЬ ХАМГААЛАГЧИД ШИНЭ УНААТАЙ БОЛЛОО
Байгаль орчин, аялал жуулчлалын сайд, тус аймгийн Засаг даргын хооронд байгуулсан 2022 онд хамтран ажиллах гэрээнд албан хаагчдын нийгмийн баталгааг хангахад дэмжлэг үзүүлэх зорилгоор орон нутгийн төсвөөс 4 сумын байгаль хамгаалагчдыг шинэ мотоциклтой болгохоор тусгагдсан байдаг.
Уг мотоциклуудыг аймгийн Засаг дарга Д.Бауыржан болон БОАЖГ-ын дарга Ш.Марат нар Баяннуур, Ногооннуур, Толбо, Цэнгэл сумын байгаль хамгаалагчдад гардуулж өглөө. Ингэснээр одоогийн байдлаар тус аймгийн 20 байгаль хамгаалагч унаатай болоод байна.

ХУУЛЬ БУСААР ХИЙГДСЭН ШИНЖЭЭЧИЙН ДҮГНЭЛТ, ҮНЭЛГЭЭНИЙ ТАЙЛАН ЗЭРГИЙГ ХҮЧИНГҮЙ БОЛГОНО
Байгаль орчин, аялал жуулчлалын яамны Байгаль орчны үнэлгээ аудитын хэлтсийн нэр бүхий албан хаагчид, мэргэжилтнүүдтэй холбоотой авлига, албан тушаалын гэмт хэргийн талаарх гомдол, мэдээлэл ирсэн тул уг асуудлыг хуулийн дагуу шалгуулахаар Авлигатай тэмцэх газарт шилжүүлэн шалгуулж байна.
Иймд тухайн асуудалтай холбогдуулан 2022 он гарснаас хойш Байгаль орчин, аялал жуулчлалын яамны Байгаль орчны үнэлгээ аудитын хэлтэст хийгдсэн байгаль орчны нөлөөллийн ерөнхий үнэлгээ болон байгаль орчны нөлөөллийн нарийвчилсан үнэлгээний тайланг нэг бүрчлэн эргэн шалгаж, холбогдох этгээдүүдэд Захиргааны ерөнхий хуулийн дагуу сонсох ажиллагаа хийж эхлээд байна.

ХӨВСГӨЛ АЙМГИЙН ХАТГАЛ ТОСГОНЫ МАЛЧИН, ИРГЭДЭД ГАЗРЫН ГЭРЧИЛГЭЭГ ГАРДУУЛЖ ӨГӨВ
Төрж, өссөн нутаг орондоо мал маллахаас гадна аялал жуулчлал бааз, гэр буудал үйл ажиллагааг явуулах хүсэлтээ илэрхийлж олон жил болж байгаа иргэдийн асуудлыг Байгаль орчин, аялал жуулчлалын яамнаас шийдвэрлэж эхэллээ.

ОЙН ДАГАЛТ БАЯЛАГИЙГ ХАМГААЛАХ, ЗОХИСТОЙ АШИГЛАХ ЖУРАМ ШИНЭЧЛЭГДЭВ
Байгаль орчин, аялал жуулчлалын сайдын 2022 оны 08 дугаар сарын 04-ний өдрийн А/282 дугаар тушаалаар ‘’Ойн дагалт баялгийг хамгаалах, зохистой ашиглах журам’’-ыг шинэчлэн баталлаа.
Шинэчлэн баталсан журмаар хуш модны самрыг жил бүрийн 09 дүгээр сарын 20-ны өдрөөс дараа оны 02 дугаар сарын 01-ний дотор түүж бэлтгэнэ.

ӨРХ БҮРТ ТАВАН МОД ТАРИХ САНААЧИЛГА АМЖИЛТТАЙ ХЭРЭГЖИЖ ДУУСЛАА
Энэхүү санаачилгын үр дүнд нийслэлийн Хан-Уул дүүргийн 9,10,16 дугаар хорооны нийт 500 өрх айлын хашааг моджуулав. Дэвшилтэт Социал Демократ клуб сайн дурын залуучууд, дүүргийн бүх айл, хэсгийн ахлагч, зохион байгуулагч, нийгмийн ажилтан та бүхэнд талархал илэрхийлье.

“МОНГОЛ ОРНОО ХОГНООС САЛГАЯ” АЯНЫ ХҮРЭЭНД БАЯН-ӨЛГИЙ АЙМАГТ
БОАЖ-ын Сайдын албан даалгаврын биелэлтийг хангуулах зорилгоор Сумдын Засаг дарга нарт шаардлага тавьж, албан бичиг хүргүүлэн цэвэрлэгээний ажлуудыг шат дараалалаар зохион байгуулан ажиллаж байна. Үүнд: Өлгий сум, Алтанцөгц, Толбо ,Улаанхус сумуудад орших Олоннуур, Ховд голуудын эхийг цэвэрлэх ажлууд хийгдээд байна.

БУЛГАН АЙМГИЙН ХАНГАЛ, ОРХОН, СЭЛЭНГЭ, ТЭШИГ СУМДЫН УСНЫ САН БҮХИЙ ГАЗАР, УСНЫ ЭХ ҮҮСВЭРИЙН ХАМГААЛАЛТЫН БҮСИЙГ ТЭМДЭГЖҮҮЛЭЛТИЙН АЖИЛ ХИЙЛЭЭ
Булган аймгийн Засаг даргатай 2022 оны 03-р сарын 30-ны өдөр байгуулсан “Усны сан бүхий газар, усны эх үүсвэрийн онцгой болон энгийн хамгаалалтын, эрүүл ахуйн бүсийг тэмдэгжүүлэлт, усны тоо бүртгэлийн ажлын гэрээ”-ний дагуу Булган аймгийн Тэшиг суманд 18ш, Сэлэнгэ суманд 18ш, Орхон суманд 18ш, Хангал суманд 15ш тэмдгүүдийг тус тус байршуулан сумдын ЗДТГ-т хүлээлгэн өглөө. Мөн Орхон аймгаас 140 км зайд орших Баалий хад нь Сэлэнгэ сумын байгалийн үзэсгэлэнт газруудын нэг бөгөөд аялагч амрагчид их ирдэг тул хог хаягдал ихээр хуримтлагдсан байсныг цэвэрлэж, нийт 200м2 газраас 1.5 тн хог хаягдлыг хоёр машин, найман хүний оролцоотой цэвэрлэн тээвэрлэв.

ДУНДГОВЬ АЙМАГТ
Байгаль орчин, аялал жуулчлалын сайдын 2022 оны 08 дугаар сарын 31-ний өдрийн 09 дүгээр албан даалгаврын хэрэгжилтийг хангаж, Дундговь аймгийн Сайхан-Овоо сумын төв орчмын Онгийн голын ай сав дагуух хоёр тонн хог хаягдлыг тус сумын ерөнхий боловсорлын сургуулийн дунд, ахлах бүлгийн багш, сурагчид сумын Засаг даргын тамгын газрын албан хаагчид хамтран цэвэрлэж, хогийн цэгт төвлөрүүлэв.

ЗАВХАН АЙМАГТ
Сав газарт хамрагдах Завхан аймгийн Их-Уул сумын Зартын рашаан орчмын хог хаягдлыг Идэр голын сав газрын захиргааны алба хаагчид 9-р сарын 9-ний өдөр цэвэрлэлээ. Нийт 1,5 тн хог цэвэрлэн ачиж, Тосонцэнгэл сумын төвлөрсөн хогийн цэгт буулгалаа. Мөн рашаанд амарч, аялж байгаа иргэдэд хог хаягдал, усны сан бүхий газрын хамгаалалтын бүсийн дэглэмийн талаар мэдээлэл, зөвлөмж өгч ажиллав.

ОРХОН АЙМАГТ
БОАЖ-ын сайдын "Усны сан бүхий газрыг бохирдож, хомстохоос хамгаалах арга хэмжээний тухай" 09 тоот албандаалгаврын хүрээнд Орхон аймгийн усны сан бүхий газрын хамгаалалтын бүс, түүний орчмын хог хаягдал, бохирдлыг тодорхойлох судалгаа, хяналт шалгалтын ажлыг БОАЖГ, Баян-Өндөр, Жаргалант сумын ЗДТГ, СГСГЗ, ОББҮХ хамтран зохион байгуулж, цэвэрлэгээний ажлыг эхлүүлээд байна.

Баян-Өндөр сумын Говил багийн иргэн С.Сурмаажавын гахайн фермерийн үйл ажиллагаа нь Говил голын хамгаалалтын бүсэд сөрөг нөлөөлөл үзүүлж буй зөрчлийг илрүүлж, хугацаатай үүрэг даалгавар өгсний дагуу 40 орчим шоо метр ахуйн болон үйлдвэрлэлийн хог хаягдлыг цэвэрлүүллээ.

Жаргалант сумын ЗДТГ, аймгийн Хөдөлмөр, халамж үйлчилгээний газартай хамтран Хангал голын гольдрол дагуух хог хаягдлыг цэвэрлэх ажлыг хоёр өдрийн хугацаанд зохион байгуулав.
Цэвэрлэгээг Эрдэнэт хаалганаас эхлэн голын гольдрол дагуу 20 км, голын эргээс хоёр тийш тус бүр 50 м, онцгой хамгаалалтын бүсэд 30 хүний бүрэлдэхүүнтэйгээр таван техник хэрэгсэлтэйтэйгээр зохион байгууллаа.

ӨМНӨГОВЬ АЙМАГТ
Өмнөговь аймгийн 15 сумын Засаг дарга нарт Байгаль орчин, аялал жуулчлалын сайдын 2022 оны 09 дүгээр албан даалгаварыг хүргүүлж, усан сан бүхий газарт, түүний хамгаалалтын бүс, түүний ойр орчмын хог хаягдлыг цэвэрлэх ажлыг зохион байгуулан ажиллах чиглэлийг хүргүүлээд байна. Хүрмэн сумын төвийн хүн амын усан хангамжийн эх үүсвэрийн усан сан болон сумын төвийн 10 кмт орших Хондлойн, Нарийн голын нэртэй булаг шандны эхийн ахуйн хог хаягдлыг цэвэрлэх ажлыг байгаль хамгаалах Аргаль клубын хүүхэд багачууд, Засаг даргын тамгын газрын албан хаагчид хамтран зохион байгууллаа.

СЭЛЭНГЭ АЙМАГТ
Тужийн нарсны байгалийн цогцолборт газрын хамгаалалтын захиргаанаас байгалийн нөөцийн хамгаалалтын ажлын хүрээнд:
Хадлан тэжээл бэлтгэх гэрээг иргэдтэй байгуулж байгаатай холбогдуулан тус хамгаалалтын захиргааны мэргэжилтэн, байгаль хамгаалагчид Тусгай хамгаалалттай бүс нутагт байнгын хяналт шалгалтын ажлыг зохион байгуулж байгаль орчны эсрэг гэмт хэрэг, зөрчлөөс урьдчилан сэргийлэх, ажлыг зохион байгуулан ажиллаж байна. Мөн уур амьсгалын өөрчлөлтөд дасан зохицох, стратеги төлөвлөлтийг боловсронгуй болгох, орон нутгийн иргэдийн байгаль орчин болон байгалийн нөөцийн салбарт дасан зохицох чадавхийг бэхжүүлэх төслийн хүрээнд уур амьсгалын эрсдлийн үнэлгээ хийх ерөнхий зарчим сургалтад тус хамгаалалтын захиргааны мэргэжилтэнгүүд хамрагдлаа.

ХЭНТИЙ АЙМАГТ
Байгаль орчин, аялал жуулчлалын сайдын 2022 оны 09 дугаар албан даалгаварын хэрэгжилтийг хангах ажлын хүрээнд Хэнтий аймгийн Бор-Өндөр сум усан сан бүхий газар, түүний хамгаалалтын бүс орчмын 15га газрыг 40 хүний бүрэлдэхүүнтэй цэвэрлэн, 1,5 тн энгийн хог хаягдалыг төвлөрсөн хогийн цэгт хаяж, 30кг архины шил, 15кг хуванцар, 5 кг лаазыг дахивар хог хаягдал авах цэгт өгсөн байна.

Умард говийн гүвээт-Халхын дундад талын сав газарт хамрагдах Хэнтий аймгийн Бор-Өндөр сумын “Хэрэм”-ийн булгийн эхийг цэвэрлэх ажлыг зохион байгууллаа. Цэвэрлэгээнд хоёр албан байгууллагын 40 ажилтан, дөрвөн машин, техник оролцон 12 га талбайд цэвэрлэгээ хийж, нийт 1.5 тонн ахуйн хог хаягдлыг цэвэрлэн ангилан ялгав.Дээрх хог хаягдлын нэг хувийг хуванцар сав, хоёр хувийг шил лааз, 0.3 хувийг цаас, 96.7 хувийг ахуйн зориулалттай хог хаягдал тус тус эзэлж байна

ХОВД АЙМАГТ

Мөнххайрханы БЦГ-ын хязгаарлалтын болон орчны бүсэд хог хаягдлын тухай хуулийн хэрэгжилтийг хангуулах, усан сан бүхий газруудын болон суурин газруудын эзэнгүй хог хаягдлыг орчны бүсийн сумуудтай хамтран цэвэрлэх, зорилгоор орчны бүсийн сумдад Хог хаягдал цэвэрлүүлэх нэгдсэн удирдамж гарган хүргүүлж, шат дараатай арга хэмжээг авч хэрэгжүүлж байна. Сумын Засаг даргын Тамгын газар, Ерөнхий боловсролын сургуулийн сурагчидтай хамтран сумын төвийн орчинд нэг км-ийн тойрогт уулын бэл, гуу жалга, Сэнхэрийн гол, түүний ай сав газрын хог хаягдлыг цэвэрлэх ажлыг зохион байгуулан хийж гүйцэтгэлээ. Мөн Улаан уулын бэл хормой, гуу жалга, дээд Хөх эргээс Улиаст тохой хүртэл нийт 5 км газарт /15 орчим га талбай/ усны хажуу гуу жалга, усан доторхи хог хаягдлыг цэвэрлэж тус суман үйл ажиллагаа явуулдаг аж ахуй нэгж байгууллага, ерөнхий боловсролын сургуулийн сурагчид хамтран цэвэрлэв.

ТАНИЛЦ: Байгаль орчин, аялал жуулчлалын яамны долоо хоногт хийж хэрэгжүүлсэн ажлууд