УИХ-ын чуулганы /2022.10.14/-ны өдрийн хуралдаанаар Монгол Улсын Их Хурлын гишүүн М.Оюунчимэгээс Монгол Улсын Ерөнхий сайдад хандаж “Эмийн үйлдвэрлэл, чанар, хяналт, хүртээмжийн зэрэг асуудал болон энэ талаарх цаашдын бодлого, зорилтын талаар”, Монгол Улсын Их Хурлын гишүүн Ц.Туваанаас Эрүүл мэндийн сайдад хандаж “Эм үйлдвэрлэл, эмийн үнийн талаар” тус тус тавьсан асуулгын хариуг сонслоо.

Гишүүд тус асуулгын талаар асуулт асууж байр, сууриа илэрхийллээ.

УИХ-ын гишүүн Б.Бейсен:

Эм бол онцгой бүтээгдэхүүн, улсын аюулгүй байдалтай ч холбоотой. Тиймээс төрөөс эмийг сайн бүртгэж чадвал хяналт сайн тавих боломжтой. Гэтэл манай улс эмийг олон улсын нэршлээр биш худалдааны нэршлээр бүртгэдэг. 10-20 төрлийн нэршлээр бүртгэснээр олон эм орж байгаа юм шиг харагддаг. Олон улсын нэршлээр бүртгэхэд ямар бэрхшээл байна вэ?

Аудитын дүгнэлтээр салбарын тогтвортой хөгжлийг хангасан систем бүрдээгүй, бодлогын хувьд залгамж чанар алдагдсанаас үүдэн төрөөс баримтлах эмийн бодлогын хэрэгжилтийг хангаагүй, үр дүнг үнэлээгүй байна. Мөн хүн амын эмчилгээний өндөр идэвхтэй, аюулгүй чанарын баталгаатай эм, эмнэлгийн хэрэгслээр жигд хүртээмжтэй хангах ил тод дүн шинжилгээнд суурилсан хяналтын тогтолцоо бүрдүүлэх шаардлагатай гэсэн байна. Энэ талаар ямар арга хэмжээ авч ажиллаж байна вэ?

ДЭМБ-ын зөвлөмжийн дагуу эмийн зохицуулалтын байгууллагын чадамжид 2 жил тутам үнэлгээ хийж байх ёстой.  Энэ талаар ямар ажил хийж байна вэ? Үйлдвэрээс хэрэглэгчдэд хүртэл тээврийн даатгалд 5-8%, гаалийн нөат дээр 15.5%, ханган нийлүүлтийн нэмэгдэл 15-45% борлуулалтын нөат 10%, эмийн сангийн нэмэгдэл 15-35% гэсэн тоог эм, эмнэлгийн хэрэгслийн газраас гаргасан байна. Энэ олон нөат-аас болоод эмний үнэ нэмэгдээд байна. Үүнд дүн шинжилгээ хийсэн үү?