БОАЖ-ын дэд сайд Г.Түвдэндорж Финланд Улсын Гадаад хэргийн яамны Гадаад худалдаа, эдийн засгийн хамтын ажиллагаа хариуцсан Төрийн нарийн бичгийн дарга Нина Васкүнлатиг хүлээн авч уулзав.

Уулзалтаар Финланд Улстай ойн тогтвортой менежментийн хамтарсан судалгаа, шинжилгээ хийх, менежментийн чадавхыг бэхжүүлэх чиглэлээр хамтран ажиллах;

Уур амьсгалын өөрчлөлтөд дасан зохицох, цэвдгийн судалгаанд үндэслэн ойг хамгаалах, нөхөн сэргээхэд ойн тогтвортой менежментийн төслийг санаачлах зэрэгт санал солилцож Финланд улсын хөдөө аж ахуй, ойн яамтай ойн салбарт хамтран ажиллах санамж бичигт гарын үсэг зурлаа.

“Тэрбум мод” үндэсний хөдөлгөөнийг хэрэгжүүлж буй энэ цаг хугацаанд хамтран ажиллах санамж бичиг байгуулсан нь бидний хувьд томоохон дэмжлэг болно гэдгийг БОАЖ-ын дэд сайд Г.Түвдэндорж онцоллоо.

Уулзалтад Монгол Улсаас Шведийн Хаант Улсад суугаа Элчин сайд Т.Жанабазар, Гадаад харилцааны яамны Европын газрын дэд захирал Б.Биндэръяа, Ойн бодлого зохицуулалтын газрын дарга Б.Оюунсанаа зэрэг албаны хүмүүс оролцов.

Финланд Улсын Хөдөө аж ахуй, ойн яамтай хамтран ажиллах санамж бичиг байгуулав