Төсвийн тухай хуульд тавьсан Ерөнхийлөгчийн хоригтой холбогдуулан Ж.Сүхбаатар, С.Оюун, Д.Арвин, Д.Балдан-Очир, Д.Одбаяр, Д.Тэрбишдагва нарын гишүүд Ерөнхийлөгчийн зөвлөхөөс асуулт асууж хариулт авав. Харин УИХ-ын гишүүн Ц.Батбаяр, Д.Оюунхорол, Сангийн сайд С.Баярцогт нар Ерөнхийлөгчийн зөвлөх төсвийн хуулийн талаар дутуу дулимаг ойлголттой, хариуцлагагүй зүйл ярьж байна гэдгийг хэлж байв.

Дараа нь Ерөнхийлөгчийн хоригийн талаар Хууль зүй, Төсвийн байнгын хорооны хуралдаанаас гаргасан санал, дүгнэлтийг гишүүн Ж.Энхбаяр, Ц.Батбаяр нар танилцуулав. Хууль зүйн байнгын хороо энэ сарын 15, Төсвийн байнгын хороо энэ сарын 17-ны өдөр энэ асуудлыг авч хэлэлцэхэд хуралдаанд оролцсон гишүүдийн олонхи нь Ерөнхийлөгчийн хоригийг хүлээж авах боломжгүй гэж үзсэн байна.

Ингээд байнгын хороодын саналын томъёоллоор санал хураалгахад нэгдсэн хуралдаанд оролцсон 57 гишүүний 44 нь буюу 77.2 хувь нь Ерөнхийлөгчийн хоригийг хүлээж авах боломжгүй гэсэн санал өгөв.

Мөн үдээс өмнө нэгдсэн чуулганаар Засгийн газрын 100 хүртэл тэрбум төгрөгийн үнэт цаас гаргах зөвшөөрөл олгохыг хүссэн хүсэлтийг УИХ хэлэлцэхээр боллоо

УИХ-ын гишүүд Ерөнхийлөгчийн хоригийг хүлээн авах боломжгүй гэж үзлээ