Гэтэл 2010 он гармагц хүүхэд бүрт сар бүр олгодог 3000, улирал бүр олгодог 25000 төгрөгийг хасч байгаа гэх юм. Түүгээр ч үл барам шинээр гэр бүл бологсодын 500 000 төгрөг, шинэ төрсөн хүүхдийн 100 000 төгрөг, эхийн одонгийн мөнгийг ч болих шийдвэр гаргасан гэнэ. Энэ олон халамжийг бүгдийг байлгахыг хүссэнгүй.

Гагцхүү “хүүхдийн” тодотголтой мөнгө бүү тасраасай гэж хүсэх байна. Хүний хөгжил сангийн хишгийг хүүхдэд эхэлж хүртээнэ. Энэ нь жилд 120 мянган төгрөгийг сар бүр 10 мянган төгрөг болгон өгнө гэж хэлцэгдэж байна. Ингэснээр “хүүхдийн” тодотголтой мөнгөнөөс 16 мянган төгрөгийг таначихлаа. Бүтэн жилийн хугацаанд 136 мянган төгрөг хүүхдэд зориулдаг байсан. Энэ нь хүүхдийн багахан ч гэсэн асуудлыг шийддэг байв. 

Эхчүүд балчир үрсдээ “Ээж нь хүүхдийн мөнгө буухаар “го го” авч өгнө. Хүүхдийн мөнгө буухаар тоглоом авч өгье” гэж хэлэхээ болих үе тун ч ойртжээ.

2004 оноос халамжийн зардал 2-4 дахин нэмэгдлээ гээд шүүмжилж, зарим нэгэн нь Монгол орон хавтгайрсан халамж олгож байна. Арай хэтэрлээ гэнэ. Тийм хүмүүс балчир үрсийн цэцэрлэг яслийн хүрэлцээ хэр байгаа билээ. Хэчнээн хүүхэд гэртээ өсч торниж байгааг мэддэг болов уу. Хэдхэн нүүрсний улаан цог ёлтоох, бүлбэгэр пийшингийн дэргэд бээрсэн ягаан гараа дулаацуулан ах эгчийгээ, аав ээжийгээ харуулдан суугаа олон хүүхэд “Миний мөнгө буухаар надад го го авч өгнө” гэж сэтгэл дотроо галтай дулаацаж суудаг. Хоног тоолон байж хүлээдэг хүүхдийн мөнгө буух өдөр багачууд нэрлэж мэддэг цөөн хэдэн амттанаа авна. Модтой чихрээ хүлхэж, мульт жүүсээ уугаад, чоко пайгаа идэж, хэдэн өдөр ярих сонинтой болно доо. Бяцхан үрсийнхээ инээд баяслаас бүү хороогооч, амттанаас бүү булаагаач.