Ерөнхий сайд энэ үеэр хэлэхдээ, УИХ-аас Хүний хөгжил сангийн тухай хууль болон Хүний хөгжил сангийн 2010 оны төсөв, “Төсөв баталсантай холбогдуулан авах зарим арга хэмжээний тухай” УИХ-ын 2009 оны 85 дугаар тогтоолыг баталснаар Засгийн газрын үйл ажиллагааны хөтөлбөрт тусгагдсан “Стратегийн болон томоохон орд газраас олсон орлогоос иргэн бүрт 1,5 сая төгрөг хүртээх эрх зүйн орчин болон санхүүгийн эх үүсвэрийг бүрдүүлж хэрэгжүүлнэ” гэсэн зорилт хэрэгжих боломжтой болж байна.

Дээрх хууль тогтоомжийг хэрэгжүүлэхтэй холбогдох УИХ, Засгийн газрын тогтоолыг батлан гаргаж, 2010 онд иргэн бүрт хишиг, хувь хүртээх ажлыг нэн даруй эхлүүлэх зохион байгуулалтын арга хэмжээг нэн даруй авах шаардлагатай байгааг харгалзан Ерөнхий сайдын 2009 оны 124 дүгээр захирамжаар шийдвэрийн төсөл боловсруулах ажлын хэсгийг байгуулж ажиллууллаа.

Ажлын хэсгээс боловсруулсан УИХ, Засгийн газрын тогтоолын болон журмын төслийг Засгийн газрын ээлжит бус хуралдаанаар хэлэлцэж шийдвэрлэсний дагуу УИХ-ын энэхүү хоёр тогтоолыг өргөн барьж байна гэлээ.

Засгийн газраас боловсруулсан “Хүний хөгжил сангаас Монгол Улсын иргэнд 2010 онд хишиг, хувь хүртээх тухай” УИХ-ын тогтоолын төсөлд хүн ам, өрхийн шинэчилсэн бүртгэлд бүртгэгдсэн, иргэний харьяаллын зөрчилгүй Монгол Улсын иргэнд 2010 онд Хүний хөгжил сангаас хүртээх хишиг, хувийн хэмжээг 120 мянган төгрөгөөр тогтоохоор тусгажээ.

Харин “Иргэний шинэчилсэн бүртгэл явуулах тухай” УИХ-ын тогтоолын төсөлд Монгол Улсын иргэнд хишиг, хувь хүртээх үйл ажиллагааг иргэний шинэчилсэн бүртгэлтэй уялдуулах, иргэний шинэчилсэн бүртгэл явуулах, иргэний ухаалаг үнэмлэх олгох суурь дэд бүтэц, иргэний биеийн өгөгдөлд суурилсан мэдээллийн нэгдсэн сан бий болгох арга хэмжээг 2010 оны аравдугаар сард багтаан хэрэгжүүлэхийг Засгийн газарт даалгах заалтыг тусгасан байна.

УИХ-ын дарга тогтоолын төслүүдийг хүлээн аваад “Хүний хөгжил сангийн тухай хууль нь төсвийн цаашдын хувь заяа, төсвийн хуваарилалтад чухал ач холбогдолтой хууль болсон. Хуулийг хэрэгжүүлэх үүднээс ирэх онд иргэн бүртээ хишиг, хувь хүртээх асуудлыг хэрхэн шийдэх талаар Засгийн газар тодорхой асуудал оруулж ирж байгаа нь сайшаалтай юм.

Хүний хөгжлийн сангаас иргэн бүртээ хишиг, хувь хүртээх асуудал нь урьд нь нийгмийн халамжийн арга хэмжээ болгон иргэн, өрх гэр бүлд олгож байсан хүүхдийн, шинэ гэр бүлийн, шинээр төрсөн хүүхдийн мөнгө гээд олон зүйлд хамаатай юм. Иймээс энэ асуудлыг УИХ ойрын үед хэлэлцэж шийдвэрлэх болно” гэдгээ хэллээ. Түүнчлэн хишиг, хувь хүртээх асуудлыг иргэний шинэчилсэн бүртгэлтэй хамтатган авч үзэж байгаа нь зөв зүйтэй юм гэдгийг онцоллоо гэж УИХ-ын Хэвлэл мэдээлэл, сурталчилгааны хэлтэс мэдээлэв.