Төр хувийн хэвшлийн түншлэлийн тухай хуулийн төслийг 2022.04.05-ны өдөр өргөн мэдүүлсэн билээ. Уг хуулийн төсөл 9 бүлэг 60 зүйлтэй.

Хууль батлагдснаар томоохон дэд бүтэц, бүтээн байгуулалтын төслүүдийг дан ганц төсвийн хөрөнгө оруулалт, гадаадын зээл, тусламжаар санхүүжүүлэх бус хувийн хэвшлийн хөрөнгө оруулалтыг татаж, өрсөлдөөнийг бий болгох, хувийн хэвшлийн ур чадварыг ашиглаж төрийн үйлчилгээг бага зардлаар олон нийтэд илүү хүртээмжтэй хүргэх шаардлага, хэрэгцээг хангах олон улсын жишгийн дагуу хууль эрх зүйн орчин бүрдэнэ гэж үзэж байгаа юм.

Намрын чуулганы нэгдсэн хуралдаанаар төр хувийн хэвшлийн түншлэлийн тухай хуулийг хэлэлцэж эхэлсэн. Хуулийн төсөлд төр, хувийн хэвшлийн түншлэлийн хүрээнд томоохон төсөл, хөтөлбөрийг хэрэгжүүлэх эрх зүйн орчин болон орон нутагт бүтээн байгуулалтын төсөл хэрэгжүүлэх боломж, нөхцөлийг хэрхэн бүрдүүлсэн талаар УИХ-ын гишүүн Н.Наранбаатар тодруулж буй.

Тэрээр хуулийн үндсэн зорилт болох дэд бүтэц, томоохон бүтээн байгуулалтыг төр дангаараа хийх бус хувийн хэвшил, аж ахуйн нэгжүүдээр хийх боломжийг хуулиар нээж өгөх, тэдний хөрөнгө оруулалтаар төсөл, хөтөлбөр хэрэгжүүлэх боломжтой гэж үзэж байгаа юм.

Тодруулбал

“Дорноговь аймгийн Даланзадгадын дулааны цахилгаан станц ашиглалтад орсон цагаасаа эхэлж доголдсон учраас дахин шинэ станц барих шаардлагатай. Шинээр барья гэхэд улсын төсөвт хүндрэлтэй учраас орон нутагтаа гаргалгаа гаргасан талаар онцолсон”

УИХ-ын гишүүн Н.Наранбаатар:

"Энержи ресурс" ХХК-тай хамтраад тэдний хөрөнгөөр 50мв-ын дулааны станц барихаар ярьсан. Тэдний зүгээс зураг төсвийг хөрөнгөөрөө гаргаад санхүүжилт нь тухайн үед 35 тэрбум байсан. Энэ төсвийг ч гэсэн “Энержи ресурс ХХК” гаргаад барья. 10-15 жил ашиглаад хэрэглэгчдээсээ зардлаа гаргаад аймагт шилжүүлж өгье гэж яриад одоо хүртэл эхэлж чадаагүй л яваад байна. Орон нутаг хувийн хэвшилтэйгээ хамтраад өөрийнхөө дулааны эх үүсвэрийг шийдэх боломжийг энэ хуулиар нээж өгсөн үү гэсэн юм.

Төр хувийн хэвшлийн түншлэлийн тухай батлагдан хэрэгжснээр Монгол Улсын санхүү, төсвийн удирдлага, тогтолцоонд шинэ зохицуулалт, санхүүгийн эх үүсвэр бий болгох, эдийн засгийн үр ашиг, нийгмийн ач холбогдол бүхий нийтийн зориулалттай дэд бүтэц болон төрийн үйлчилгээний салбарын хөгжлийн төслүүдийг хэрэгжүүлж, улс орны хөгжлийн зорилтуудыг хангах боломжийг бүрдүүлнэ гэж хууль санаачлагчид үзжээ.

Н.Наранбаатар: Төр хувийн хэвшлийн тухай хуулиар орон нутагт томоохон төсөл хөтөлбөрүүдийг хэрэгжүүлэх боломжтой