Авлигатай тэмцэх газар, Хөдөлмөр нийгмийн хамгааллын яам, Хөдөлмөр халамжийн үйлчилгээний ерөнхий газар хамтран “Амьжиргаа дэмжих зөвлөлийн үйл ажиллагаа уялдаа холбоо” хэлэлцүүлэг зохион байгууллаа.

Иргэний нийгмийн халамжийн үйл ажиллагаанд хамруулах эсэх шийдвэрийг гаргах явцад гарч буй хүндрэл бэрхшээлийг хэлэлцэх, энэ үйл ажиллагаанд оролцогч төрийн анхан шатны нэгж болон амьжиргаа дэмжих зөвлөлийн хамтын ажиллагааны уялдаа холбоог хангахад уг хэлэлцүүлгийн зорилго оршсон.

Хэлэлцүүлэгт нийгмийн халамжийн шинэчлэлийн бодлого, Амьжиргааг дэмжих зөвлөлийн үйл ажиллагааны танилцуулга, Зөвлөлийн дүрмийг хянах явцад гарсан санал шүүмжлэл, цаашид анхаарах асуудлуудаар Авлигатай тэмцэх газар, Хөдөлмөр, нийгмийн хамгааллын яамны болон Хөдөлмөр, халамжийн үйлчилгээний хэлтсийн албан тушаалтнууд илтгэл тавьж, асуулт хариулт өрнүүлсэн юм.

Монгол улсад 2022 оны байдлаар 330 сум, 171 хороонд амьжиргааг дэмжих сан үйл ажиллагаа явуулж байна. 2000 дээш хүн амтай сум, тосгонд иргэдийн төлөөлөгчдийн хурлын шийдвэрээр зөвлөл байгуулж болдог. Энэ шийдвэрийн дагуу өнөөдрийн байдлаар 49 баг 10 тосгонд шинээр амьжиргаа дэмжих зөвлөл байгуулагдаж ажиллаж байгаа аж.

Зөвлөл 7 хүний бүрэлдэхүүнтэй байдаг.

Ингээд “Амьжиргаа дэмжих зөвлөлийн үйл ажиллагаа, уялдаа холбоо” хэлэлцүүлгээс Цахим хөгжлийн яам, “И-Монгол академи” УТҮГ зэрэг төрийн эрх бүхий байгууллагуудтай хамтран “Амьжиргаа дэмжих зөвлөл”-ийн шийдвэрийг цахим хэлбэрт шилжүүлэх арга хэмжээг авах, “Амьжиргаа дэмжих зөвлөл”-өөр хэлэлцэж байгаа асуудлаарх шаардлагатай мэдээллийг цахим хэлбэрээр харах нөхцөлийг бүрдүүлэх, төрөөс нийгмийн халамжийн үйлчилгээ үзүүлэх эсэхийг хэлэлцэн шийдвэрлэж байгаа шат дамжлагыг цөөлөх зэрэг чиглэлээр зөвлөмж гаргасан бөгөөд эдгээр санал, зөвлөмжүүдийг холбогдох байгууллагуудад уламжилж, шийдвэрлүүлэхээр болов.

Амьжиргаа дэмжих зөвлөлийн шийдвэрийг цахим хэлбэрт шилжүүлэх шаардлагатай гэж үзэв