Хэдхэн сарын өмнө Онцгой байдлын Ерөнхий газрын дарга, хошууч генерал Г.Ариунбуян “Мөрөөдөл биелдэг юм” төсөлд нэгдэж нэг алба хаагчаа байртай болгоход дэмжлэг үзүүлэх талаар УИХ-ын гишүүн Э.Бат-Амгалантай санал зөвшилцөж байсан билээ. 

Тэгвэл өнөөдөр эл санаачилга бодит ажил болж Г.Ариунбуян генерал, дүүргийн удирдлагуудтай хамт Баянзүрх дүүргийн Онцгой байдлын хэлтсийн гал түймэр унтраах, аврах 63 дугаар ангийн ахлагч Б.Баярмаад 2 өрөө байрны түлхүүр гардуулан өглөө.

Б.Баярмаагийн хувьд энэ салбартаа 10 гаруй жил ажиллаж буй.  Тэрээр дүүргийн 21-р хороо Дарь-Эх орчимд түрээсийн хашаа байшинд нөхөр, 4 хүүхдийн хамт амьдарч байсан юм.

УИХ-ын гишүүн Э.Бат-Амгалан: "Цаг уурын ямар ч нөхцөлд улс эх орон, хүн ардынхаа эрүүл энх, аюулгүй байдлын төлөө өргөсөн тангарагтаа үнэнчээр зүтгэж буй Б.Баярмаа болон ОНЦГОЙ салбарын нийт алба хаагчдад баяр хүргэж, амжилт хүсье" гэв.