УИХ-ын чуулганы өнөөдрийн \2023.01.06\ нэгдсэн хуралдаанаар Монгол Улсын төрийн цахим шилжилтийн өнөөгийн байдал, цаашдын зорилтуудын талаар мэдээлэл сонсов.

Мэдээллийг УИХ-ын гишүүн, ЦХХХ-ны сайд Н.Учрал танилцууллаа.

Монгол Улсын Засгийн газар харилцаа холбоо, мэдээллийн технологийг эдийн засгийн тэргүүлэгч салбарын нэгээр зарлаж, “Цахим Үндэстэн” болох уриалгыг дэвшүүлсэн. Энэ хүрээнд Харилцаа холбоо, мэдээллийн технологийн газрыг татан буулгаж, Цахим хөгжил, харилцаа холбооны яамны үйл ажиллагааны стратеги, зохион байгуулалтын бүтцийн өөрчлөлтийн хөтөлбөр, зохион байгуулалтын бүтэц, орон тооны дээд хязгаарыг Засгийн газрын 2022 оны 01 дүгээр сарын 06-ны өдрийн 13 дугаар тогтоолоор баталсан билээ.

Цахим хөгжил, харилцаа холбооны  сайдаар Н.Учралыг,  Төрийн нарийн бичгийн даргаар Ч.Золбаяр нарыг томилов.

Цахим хөгжил, харилцаа холбооны яам нь:

• Бодлого төлөвлөлтийн газар
• Цахим хөгжлийн бодлогын хэрэгжилтийг зохицуулах газар
• Харилцаа холбооны бодлогын хэрэгжилтийг зохицуулах газар
• Кибер аюулгүй байдлын бодлогын хэрэгжилтийг зохицуулах газар
• Төрийн захиргааны удирдлагын газар
• Хяналт-шинжилгээ, үнэлгээ, дотоод аудитын газар гэсэн зургаан газар, найман хэлтэстэй, нийт 87 орон тоотой байна.