Монгол Улсын улс төрийн ууган хүчин Монгол Ардын Нам үүсгэн байгуулагдсаны түүхт 102 жилийн ой, Эх орончдын өдрийн баярын мэндийг Монголын нийт ард түмэндээ өргөн дэвшүүлье!

Он цаг урсаж, түүхийн хуудас зузаарахын хэрээр өнөөдрийг бий болгосон үе үеийн эх орончдыг бид мартах ёсгүй. Тэдний байгуулсан гавьяа, түүхэн үйл хэргийг бүдгэрүүлж, үгүйсгэх аливаа оролдлого бүр ч байж болохгүй. Өчигдөргүй өнөөдөр, өнөөдөргүй маргааш гэж үгүй.

102 жилийн түүхт Монголын улс төрийн ууган хүчин Монгол Ардын Намын тулгуур үзэл баримтлал, язгуур эрх ашиг бол үндэсний эрх чөлөө, тусгаар тогтнол, Монголын ард түмний сайн сайхны төлөө гэдгийг та бүхэн мэднэ.

Эх орон гэдэг иргэдийнхээ нэгдэл, зүтгэл, итгэл, хүндлэл, хариуцлага дээр оршин тогтнодог. Энэ бүхэн нэгдэж эх оронч үзэл бий болдог. Монгол Ардын Нам үүсэн бий болсон цагаасаа эх оронч үзлээр улсынхаа хөгжил дэвшилд туршлагатай, тулхтай, тооцоотой, сэтгэлтэй хандаж ирсэн нь өнөөдрийн бидний эх орны хөгжлийг бий болгосон.
Энэ өдөр бол эх орончдын үйл хэргийг зүгээр нэг дурсан тэмдэглэх төдий биш Монголчууд та бид эх оронч үзлээ урьд урьдынхаас илүү хүчтэй сэхээн сэргээж, хөгжил дэвшил, эв нэгдлийн төлөө нягтран зүтгэхийг сануулсан өдөр гэж би боддог.

Тусгаар тогтнол, эрх чөлөө минь мөнх оршиж, үе үеийн эх орончдын үйл хэрэг үргэлжлэн хүчирхэгжиж, эв эе батжин, эх орон минь хөгжин дэвшиж Монгол минь өнө мөнх орших болтугай. Та бүхэндээ Монгол Ардын Намын 102 жилийн ой, Эх орончдын өдрийн баярын мэндийг дахин дэвшүүлж, сайн сайхан бүхнийг хүсэн ерөөе.